COTABATO CITY -- Grupo sa Daesh-inspired group sa Bangsamoro Islamic Freedom Fighters (BIFF) maoy suspek pag-ambush kang South Upi Mayor Reynalbert Insular niadtong Dominggo.
Kini mismo ang gikompirma ni 6th Infantry (Kampilan) Division spokesperson Lieutenant Colonel Anhouvic Atilano.
Kahinumdoman nga napatay sa ambush ang sibilyan nga si Thelmo Divinagracia Sasi nga misakay sa convoy sa mayor, samtang samdan sila King Sasi, John Andro Tumbaga ug Pao Dalimbang, pulos sakop sa Municipal Disaster Risk Reduction and Management Council (MDRRMC-South Upi).
Nasayran nga ang convoy sa mayor gikan nag-apud-apod og relief goods sa mga bakwit sa Barangay Itaw sa maong lungsod nga mihikling sa pag-atake sa BIFF ug engkuwentro sa militar.
Apan sa ilang pagpauli, giatngan sila sa may Sitio Sukob Barangay Pandan ug gi-ambush sa grupo ni Kumander Guila sa BIFF.
Apan si Kumander Guila nanghimakak niini ug gikanayon nga wala silay kalabutan sa ambus. (Edgar E. Fuerzas)