MISMONG si Jose Abad Santos (JAS) Mayor John Jason Joyce ang mipahibawo nga kontrolado na ang diarrhea outbreak nga maoy misugat sa Bag-ong Tuig sa mga molupyo sa Barangay Butuan niadtong Disyembre 31, 2020 sa gabii.
Mokabat sa 35 ka indibiduwal ang gipangdala sa Tomas Lachica District Hospital sa lungsod apan ang tanan mahimo nang makagawas karong semanaha.
Nasayran nga paspas nakontrola ang epedemya human nga milihok dayon ang grupo ni Provincial Health Officer (PHO) Dr. Anne Margaux Quezada ug miadto sa apektadong barangay kauban ang mga sakop sa Provincial Disaster Risk and Rescue Management Office (PDRRMO) sa pagpanguna ni Harry Camorro aron asikasuhon ang mga pasyente.
Milutaw sab sa gihimong stool examinations sa PHO nga kompirmadong naay amoebiasis ang mga pasyente.
Samtang dako ang pasalamat sa mga pasyente ug sa lokal nga gobyerno ngadto sa katawhan sa Davao City human nga gitunol ni Congressman Paulo Duterte ang tabang niadtong Lunes, Enero 4.
Nasundan pa og daghang trak nga kargado og hinabang ang gipadala ni Duterte sa lugar kagahapong adlawa.
Daghan sab nga mga organisasyon ang mihatag og ayuda alang sa pamilya sa mga pasyente. (Orlando B. Dinoy)