Kita sa CSBT mikunhod og 50%

TUNGOD sa pandemya sa nasud, moabot lang sa P3 milyones ang kita sa Cebu South Bus Terminal (CSBT) sa uwahing buwan sa 2020.

Mas ubos kini kon itandi sa gibana-bana nga P7 milyones nga kita sa samang buwan sa 2019. Kini maoy gibutyag ni Carmen Quijano, manager sa duha ka mga terminal nga gi dumala sa Kagamhanan sa Lalawigan sa Sugbo.

“Pag December, niabot ta og P3,893,365.31 nga kita inspite sa pandemic. Nakita man hinuon nato nga arang-arang na lang ba kon itandi last year. Dako-daku nuon to kay niabot man og almost P7 million,” matod ni Quijano sa Enero 5, 2020. Sa Septiyembre 8 nibukas ang CSBT sa publiko, diin nakita ni Quijano ang pag-usbaw sa kita.

Sa maong higayon, may kita ang terminal nga moabot og P1, 663, 015. 40, moabot usab sa P2,669,407.83 sa Oktubre ug P2,979,897.27 sa Nobiyembre.

Gihimong bagsakan center ang terminal atol sa pagpaubos sa Sugbo sa community quarantine.

Sa hinayhinay nga pagbukas sa mga establisemento, temporaryong gibalhin usab ang mga bus sa Lantaw sa Cebu South Coastal Road (CSCR) aron may masakyan ang mga taga probinsya sa Sugbo nga nagtrabaho sa Siyudad sa Sugbo.

Karon nga bag-ong tuig, naglaom si Quijano nga mapun-an pa ang kita sa terminal ingon man ang mga moabang sa mga nabakanteng stalls sulod sa terminal. Gibutyag ni Quijano nga kon itandi kaniadto nga wa pa’y pandemya, daghan ang buot nga moakupar sa maong mga stalls.

“Tungod sa Covid gani, ang amo ganing food court mingaw kaayo... Usa ray naninda excluding sa luyo, naa may nanida pero gamay ra sad kaayo,”matod ni Quijano.

Ang terminal may moabot sa 44 ka mga stall nga sagad baligyaan sa mga pasalubong, kan-anan ug uban pa.

Apan sukad sa pandemya, moabot sa 21 na lang ang niabang sulod sa terminal.

Dako ang panghinaot ni Quijano nga sa hinay-hinay makabalik na sa normal ang pangita sa tanan nga mga Sugboanon.

“...makita man na nimo sila mao na I hope sa January, they will start again. Bag-ong Tuig, new life na pod ta,” matod ni Quijano. (ANV)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph