GIBASURA sa Office of the Ombudsman ang kasong kriminal nga gisang-at batok ni Cebu Governor Gwendolyn Garcia lakip na sa siyam ka mga opisyal sa Cebu Provincial Government ug private contractor.
Ang reklamong kalapasan sa Anti-Graft and Corrupt Practices Act may kalabutan sa kontrobersiya sa katukoran sa Cebu International Convention Center (CICC) sa dakbayan sa Mandaue niadtong 2006.
Ang desisyon giluwatan ni graft investigation and prosecution officer Daniel Von Evan Panelo og gilagdaan ni Ombudsman Samuel Martires ug Assistant Ombudsman Jose Balmeo Jr. niadtong Disyembre 21, 2020.
Subay sa 12 ka pahina nga desisyon pinitsahan niadtong Disyembre 14, 2020 gisaysay ang mga rason sa pagkalingkawas sa mga akusado sa maong kaso.
Nasayran nga mokabat ngadto sa P830 milyones ang nagasto alang sa engineering, architectural ug civil works sa katukoran sa CICC nga nagsilbing venue sa 12th Asean Summit ug uban pang meetings ingon man ang ika-duhang East Asia Summit sa 2007.
Si Garcia ug ang mga kaubanan giakusahan gawas nga gipaburot ang presyo, migamit og mga substandard nga materyales nga gidapat sa maong estraktura.
Gawas ni Garcia ang siyam ka mga opisyal ang nalakip isip respondents mao sila si; Eduardo T. Habin, Roy G. Salubre, Cristina B. Giango, Necias A. Vicoy, Jr., Emme T. Gingoyon, Glenn F. Baricuatro, Bernardo E. Calderon, Marino D. Martinquilla, Eulogio B. Pelayre ug Willy Te ang Vice-President sa WT Construction Inc., ug ang contractor sa maong proyekto.
Subay sa bag-ong desisyon sa Ombudsman, napakyas ang prosecution sa pagpresentar sa tanan nga elemento pagpamatuod nga sad-an ang mga akusado.
“After a careful review of the records and pertinent jurisprudence, this Office finds that not all elements of the crime punishable under Sec. 3 (e) of RA (Republic Act) No. 3019 are present to indict the respondents,” suwat sa Ombudsman.
Niadtong 2013 naigo sa 7.2 magnitude nga linog ug super typhoon (Yolanda) ang Kabisayaan hinungdan sa pagkaguba sa CICC.
Gikatakda nga moluwat og pamahayag ang gobernador sa maong kalambuan. (ANV)