KON maghisgot kita og balaud sa kadalanan, uban sa pagmaneho og sakyanan, pwera buyag, daghang gyud ang malapason labi na kon walay nagtan-aw nga awtoridad sa Land Transportation Office (LTO). Masayran na lang kini kon dunay disgrasya nga mahitabo sama sa pagkamatay sa 3 ka sakop sa pamilya dihang nadumbolan ang ilang motorsiklo sa Bonggo truck sa Barangay Busay, siyudad sa Sugbo niadtong Dominggo sa gabii, Disyembre 3.
Human sa naasoy nga panghitabo, si LTO 7 Director Victor Caindec miluwat og pamahayag nga makig-alayon sa mga local government unit (LGU) aron pagsulbad sa isyu sa overloading sa mga sakyanan sa Transcentral Highway nga molatas sa nagkalainlaing bukirang dapit ug ngadto sa pikas sa isla o kasadpan nga bahin sa Sugbo labi na sa malambuon nga lungsod sa Balamban.
Sa pikas bahin, nasayod kita nga minus ang mga sakyanan nga molatas sa mga bukirang dapit busa, tungod sa pangihanglan sa pagbiyahe, ang mga tawo mamugos gyud. Ang mga drayber dili makabalibad sa pagpasakay sa subra sa ilang kapasidad gawas sa ilang pag-apas sa kita. Makita nato kanunay ang mga sakyanan nga puno sa mga utanon ug lagutmon uban sa mga tawo padulong sa Carbon Public Market. Usa kini ka reyalidad nga angay tun-an ug hatagan og konsiderasyon sa mga tigpatuman sa balaud nga nagpuyo sa patag ug abunda sa transportasyon
Maayo ang nahunahunaan ni Caindec apan kinahanglan nga dunay kasingkasing sa balaud. Gawas pa, ang suod nga koordinasyon sa LTO sa mga LGU labi na sa kabarangayan, magpitol sa mga lider sa barangay nga nag-unang malampason sa lagda sa kadalanan. Naobserbahan nga dunay ubang barangay nga nagpataka lang og park sa mga sakyanan sa barangay sa daplin sa dalan bisan apiki kini.
Ang disiplina magsugod sa atong kaugalingon.