DILI mapadayon niining tuig ang "Traslacion" o ang prosesyon sa Itom nga Nazareno tungod sa hulga sa coronavirus disease (Covid-19) pandemic, gipahibalo sa Jesus Nazareno Parish Martes, Enero 5, 2021.
"Definitely, wala na tay Traslacion. Wala na tong iadto didto sa bisperas sa Cathedral ang Black Nazarene unya sa pagkasayong buntag mga alas-4, i-procession pauli dinhi sa Nazareno," sumala ni Monsignor Perseus Cabunoc.
Matud ni Cabunoc, ilang gitan-aw ang paghigayon og usa ka motorcade o caravan ingon hulip sa prosesyon.
Dugang pa ni Cabunoc nga naghangyo na sila sa City Government nga tugotan sila nga mag motorcade alas-10 sa gabii sa Enero 8, oras nga magsugod ang curfew sa syudad.
"Diha sa curfew hours i-motorcade or i-caravan ang Black Nazarene libot sa city," ingon ni Cabunoc.
Matud ni City Disaster Risk Reduction Management Department (CDRRMD) officer-in-charge Nick Jabagat kung tugutan ang motorcade, lmitado lang ang makaapil sa convoy sa motorcade.
Si Mayor Oscar Moreno, sa iyang bahin, nagsulti nga samtang gusto niya nga adunay higayon ang mga tawo nga sundon ang ilang tinuohan ug moapil sa mga relihiyoso nga kalihokan, hinungdahon gihapon ang ilang kahimsog.
"In fact, we would like that (religious activities) to happen kay dako biya matabang ang pag ampo. However, dili lang pud nato i-expose ang katawhan sa unnecessary risks," matud ni Moreno.
Panahon sa Fiesta sa Iton na Nazareno, ang simbahan gapanghatag og mga food packs sa mga indigents ug mga personahe sa Philippine National Police (PNP), apan gipahibalo sab ni Cabunoc nga karong tuig, ang Jesus Nazareno Parish dili makahatag og mga food packs sa PNP.
"Tungod kay Covid man karon, minus gyud kaayo ang atong panudlanan, i-pranka lang nato. Karon maghangyo mi nga kaning mga food packs, mobalibad mi nga dili nami maka afford sa pag suportar sa atong mga PNP," ingon ni Cabunoc.
"Makasabot tingali mo ana tungod kay gamay ra gyud kaayo. Bisan pa atong Pasko tungod kay apektado kaayo ang mga tao, bisan daghan silang magsimba, gamay ra gyud ang atong naa sa panudlanan," dugang pa niini.