BISAN sa hugot nga seguridad ug sa gipakusgang kampanya sa pagbatok sa ilegal nga druga sa Davao City, naa gihapoy di mahadlok maninda og dagkong kantidad sa shabu.
Pasado alas 2 sa hapon, Enero 5, 2021, nasikop ang usa ka lalaki ug usa ka babaye sa gikasa nga buy-bust operation sa Buhangin Police Station didto sa McArthur Highway, Matina, Davao City.
Ang Buhangin police nag-ila sa mga suspek nga sila alyas Diana, taga Mintal, ug usa ka Rodmark Pantenople, residente sa Bugac, Maa.
Sumala sa kapulisan sa Buhangin nga high-value target (HVT) ang mga nahisgutan kinsa dugay na sab nga gipanid-an sa kapulisan ang ilang ilegal nga lihok.
Motimbang sa 90 gramos ang shabu nga naay street value nga P1.1 milyon ang nakuha gikan sa posisyon sa mga dinakpan.
Wala una mihatag og pamahayag ang mga suspetsado kinsa nagtingkagol karon sa selda sa Buhangin police, samtang giandam ang pagpasaka og kaso kanila didto sa korte.