BANA nga nagsaulog sa iyang birthday sa prisohan nisangko human nag-wild ug nangulata kay wa paliti og birthday cake sa iyang asawa sa alas 6 sa gabii, Enero 5, 2020 sa Sityo Ug-ug, Barangay Pangdan, Dakbayan sa Naga.
Si Ricky (di tinuod niya nga ngan), 40, security guard, wa nakatiwas sa paglingawlingaw sa iyang birthday kay gibalhog sa Naga City Police Station.
Giingong iyang gibali-bali pagtamparos iyang 13 anyos nga anak lalake human nilakaw ang iyang asawa dihang iyang gipamuak ang mga butang sa ilang balay kay wa siya paliti og cake.
Iya pang nabunalan og botelya sa agtang si Aljon Canalita, 23, iyang bayaw human kini nibadlong kaniya.
Human makakita si Henry Canalita, 42, sa gibuhat ni Ricky, giuwang siya.
Apan gidabo-dabohan na hinuon si Henry ni Ricky.
Si Police Staff Sergeant Ariel Yap, imbestigador sa Naga Police Station nga nahinabi sa Superbalita Cebu, nagkanayon nga hubog na si Ricky samtang nakig-inom sa mga Canalita sulod sa ilang balay.
Gitawag ni Ricky ang iyang asawa kon asa na ang iyang birthday cake nga giandam kay ipakaon sa iyang mga bisita.
Apan nagkalalis sila kay ang asawa nitubag nga wa pa siya makapalit.
Niulbo sa kasuko si Ricky kay sayo pa siya nga misugo pagprepar sa iyang birthday.
Tungod sa ilang init na kaayo nga panaglalis, ang asawa nibiya kay nagdali nga mopalit sa cake. Apan si Ricky, misamot ang kalagot, nanghagis sa ilang panimalay gipangguba ang ilang mga butang.
Ang anak nga 13 anyos nga iyang gipangita nakit-an ni Ricky, natamparosan og bali-bali.
Si Aljon, bayaw, nga nakakita, nipakalma kang Ricky, apan gibunalan og botelya ang iyang agtang.
Si Henry niuwang usab unta, apan gikulata na hinuon siya ni Ricky.
Hangtod nga niabot ang mga barangay tanod, gipakalma si Ricky.
Sa wa pa mapakalma sa mga tanod, si Ricky nag-unay sa nagbunal sa iyang ulo sa botelya hinungdan nga nasamad.
“Nakahurot na silag tulo ka long neck Empe, Sir. Unya dihang dalitan na niyag cake iyang mga bisita, wala paman diay maandam sa asawa, nanghagis,” matod ni Yap.
Ang kasong kalapasan sa Republic Act (RA) 7610 kun Anti Child Abuse Law wa nila mapasaka kay ang asawa ug anak nipasaylo kaniya.
Ang bayaw ug silingan gipaabot pa nilang mopasaka og kasong physical injury.