Nalzaro: Dili ipamugos ang Sinulog
MIPADAYAG sa ilang kusganong pagsupak sila si Emergency Operations Center (EOC) chief Konsehal Joel Garganera ug Konsehal Philip Zafra, chairman sa peace and order council, kabahin sa plano ni Vice Mayor Michael Rama, kinsa mao usab ang chairman sa Sinulog Foundation Inc., (SFI) sa pagpahigayon sa Sinulog festival karong Enero 17. Apil usab sa mipadayag sa iyang kabalaka mao si Cebu City Police Office (CCPO) Director Josefino Ligan.
May rason baya pod sila si Garganera ug Zafra. Ang kapulisan dili mosuporta kon walay pagtugot sa Inter-agency Task Force (IATF) ang kalihukan. Ang ilang gikabalak-an mao ang posibleng pagkatap sa coronavirus disease (Covid 19), labi pa niining bag-ong strain o variant karon nga mas kuyaw pa kay sa karaan nga kagaw. Gumikan kay dili man gyud kalikayan nga adunay panagtapok labi pa sa mga dancer sa matag contingent nga mosalmot sa ritual showdown.
Apan miinsister gyud si Mike sa pagpahigayon. Ang plano ni Mike nga sa matag contingent, aduna lamay mga 50 ka dancers ug support crew nga maoy magdala o magbitbit sa props nga gikinahanglan. Adto kini sila magpa-final showdown sa dakong parking area sa SM Seaside. Walay tugutan nga audience o mga tawo sa pagtan-aw sa venue. Ang mga out of town contingents mo-record sa ilang performance o sayaw didto lang sa ilang mga lugar ug dili na moanhi dinhi sa Sugbo. Ang tanang kalihukan ipaagi sa virtual o i-stream live sa Sinulog Facebook page.
Okey, walay manan-aw live sa venue. Apan makagarantiya ba si Mike Rama nga gikan sa praktis hangtod sa final showdown, dili matakbuyan ang mga dancer sa virus? Unsaon man pag-obserbar sa mga dancer og social distancing atol sa ilang praktis ug final showdown bisan kon magsul-ob sila og masks ug face shields? Kon matakbuyan sila, dili kaha na madala nila sa ilang mga panimalay ug matakdan usab ang ilang mga kauban sa balay?
Mao nang wala ako makasabot aning baruganan ug palisiya sa uban natong lider. Ilang gidili ang ginagmay’ng tapok-tapok apan ilang gitugutan ang dagkong panagtapok?
(bobbygnalzaro@gmail.com)