ADUNA nay gikonsiderar nga persons of interest ang kapulisan sa Dakbayan sa Lapu-Lapu sa pagpanglungkab sa usa ka mall sa Barangay Pusok, sa Huwebes sa buntag, Enero 7, 2021.
Matod ni Police Colonel Arnel Banzon, hepe sa Lapu-Lapu City Police Office, nga dako ang posibilidad nga di lang usa ka tawo ang nilungkab sa Gaisano Mactan Island Mall
“Ang atoang estimate is more than one ang nitrabaho ato based sa mga initial investigation,” matod ni Banzon.
Gibutyag sab ni Banzon nga way forced entry nga makita sa gawas nga bahin sa mall, apan aduna silay nakita nga giguba nga pultahan sa opisina sa establisemento.
Gawas niini aduna sab nakita nga gibakbak nga bungbong sa storage room sa mall nga nahimutang sa rooftop. Nagtuo si Banzon nga mao ang gihimong exit point sa mga kawatan.
Duha ka mga tindahan sa mga alahas ug cell shop ang gikawatan.
Sa pagsuwat ning taho, wa pa mahibaw-i sa kapulisan kon pila ang kantidad sa mga alahas, kuwarta ug ubang mga butang nga nangawala.
Nadawat sa kapulisan ang alarma pasado alas 8 sa buntag human nagpatabang ang management sa mall dihang ilang nadiskubre nga naguba na ang pultahan sa ilang opisina.
Dali nga miresponde ang kapulisan kauban si Mayor Junard Chan kinsa maoy nangulo sa inisyal nga inspeksyon sa mall.
Nagtuo si Chan nga suweto ang mga kawatan tungod sa mga ekipo nga gigamit aron pag-abli sa vault sa maong mga tindahan.
“Naa silay gigamit gayud nga puthaw nga ilang binuhat nga nangahabilin. Makaingon ta nga suweto suweto gayud kay gi-welding man nila, gi-improvise nila ang ilang mga gamit,” matod ni Chan.
Ning pagsuwat sa balita, wala pa natino sa mga awtoridad kon pila ang balor sa kuwarta ug mga butang nga nakawat sanglit nagpadayon pa ang inventory sa mga tenant sa mall.
SAMA OG ESTILO
Gibutyag usab ni Banzon nga adunay pagkapareha sa pamaagi sa pagpanglungkab nga nahitabo sa mall ug sa mga nilabay nga mga pagpangawat sa mga opisina sa City Hall.
“In a way, naay mga similarity. Naay mga gitawag nato nga the way sa pag execute noh. We are confident nga masulbad gihapon nato ni,” matod ni Banzon.
Nagtuo usab si Banzon nga anaa pa sa Lapu-Lapu ang mga kawatan ug gibutyag niini nga nagpadayon pa ang follow-up operation sa kapulisan.
“Although we have persons of interest but then again we will not focus lang kaning mga tawhana, gi-widen nato ang atong imbestigasyon,” matod ni Banzon. Nibahad usab ang maong opisyal nga di nila undangan og gukod ang maong mga kawatan.
Nisaad si Banzon nga ilang sulbaron ang mga insidente sa pagpanglungkab sa Lapu-Lapu.