DAGHANG nangutana kon mahinayon ba ang cultural presentation sa Sinulog 2021. Mi-insister man gud ang kadagkuan sa Cebu City Police Office (CCPO) nga dili sila mohatag og seguridad sa presentasyon sa sinulog karong tuiga kon dili kini mahatagan og approval sa Inter-Agency Task Force (IATF). Si Cebu City Mayor Edgardo Labella mibarug nga mahinayon ang Sinulog 2021 kon dili pugngan sa IATF ang maong kalihukan.
Mao kini ang makalibug kay samtang ang kapulisan buot nga ang pagtugot gikan sa IATF ang ilang sundon apan ang mayor mi-insiter nga kon dili pugngan, padayon. Mahimo man nga makapadayon ang Siyudad sa mga kalihukan sa sinulog kay kadaghanan niini virtual man. Magamit man nila ang mga tanod ug ubang mga personnel sa city hall ug barangay aron maoy mohatag og siguridad sa ilang mga kalihukan. Ang pangutana, dili ba mapahamtangan og silot ang mga opisyal nga muhimo sa mga programa nga walay pagtugot sa IATF? Hinaut pang ma-areglo kining maong isyu samtang aduna pay mubong panahon.
* * *
Ihinayon gayud sa Senado ang COVID-19 hearing bisan kon dili uyon si Presidente Rodrigo Duterte nga iapil pag-imbestigar si Presidential Security Group (PSG) chief Brig. Gen. Jesus Durante ug ubang mga sakop niini.
Si Sen. Franklin Drilon miila sa executive privilege ni Duterte nga usa ka balidong exercise sa iyang gahum ubos sa Executive Order 464 apan iya usab nga gibarugan ang pag-imbestigar in aid of legislation sa kongreso. Apan naay mga magbabalaud nga gustong ipatawag ang pangulo sa PSG aron makatubag kalabut sa ilang gigamit nga bakuna ug diin nila kini makuha.
Ang naandan nga buhaton kon dili motonga bisan kon sila padad-an og subpoena mao ang pag-contempt kanila diin dakpon ug prisuhon sila sa kongreso. Apan daan nang mihulga ang Presidente nga dili siya gusto nga i–contempt ang sakop sa PSG. Kon mahitabo kini adunay constitutional crisis kay magkabangga ang executive ug ang legislative department. Pero mao kini ang gilikayan sa ubang mga sakop sa Senado bisan gani ni Senate President Tito Sotto. Ang laing mahinungdanon nga masayran kon diin makakuha og bakuna ang 100,000 ka mga sakop sa POGO, mga negosyante ug mga pulitiko. Dili hinuon angayang manuyo ang ubang mga tawo nga naka-una sila pagpabakuna kay ilang mang kwarta ang gigamit niini. Ang ato nalang kay wala sila mutoman sa atong balaud kalabut sa pagamit sa maong bakuna.
(mannyrabacal1144@gmail.com)