MITUMAW ang kontrobersiya human miangkon si Presidente Rodrigo Duterte ug kadagkuan sa militar nga ang mga sakop sa Presidential Security Group (PSG) labi pa ang mga close-in security sa Presidente natusukan na og bakuna batok sa Covid 19. Wala magkadimao ang rason nga gihatag sa mga opisyal sa kagamhanan nganong nakasulod ang vaccine dinhi sa nasud ug gigamit nga way pagtugot sa Food and Drug Administration (FDA).
Ang FDA mao adunay dakong gahum o hurisdiksiyon kon maghisgot kita og tambal o medisina nga hinimo dinhi sa nasud ug sa gawas. Illegal ang medisina nga makasulod, mabaligya ug magamit dinhi kon wa pagtugot gikan sa FDA. Nganong nakasulod man dinhi sa nasud ang maong vaccine nga walay pagtugot sa FDA?
Way ngipon kining FDA. Maayo ni i-abolish.
Giangkon sa mga opisyal labi pa si Defense Secretary Delfin Lorenzana nga smuggled ang vaccine apan iyang gi-rason nga justified ang pagpasulod ug paggamit sa maong mga bakuna kay alang kini sa kaayuhan sa Presidente. Unsa? Asa naman diay ang atong mga balaod kabahin sa importasyon og mga medisina? Bisan ang Bureau of Customs way kalibutan. Matod pa ni Presidential Spokesperson Harry Roque nga donasyon ang mga vaccine apan wala niya hinganli ang donor. Pastilan no? Mo-aksiyon og imbestigar ang Senado apan gihulga hinuon ni Presidente Duterte. Hilum ang tanan.
Adunay giingon sa Eninglis nga “caught with a hand in the cookie jar.” Kon ato nang Binisay-on: “Nasakpan nga wa makapanapo.” Mao kanay tukma nga paghulagway nato niining giangkon sa atong mga tag-as nga opisyal sa gobiyerno.
So, duna nay nag una-una bahala na og wa pa ma ‘perfect’ ang kaluwas ug ka-epektibo sa bakuna nga ilang gi-ilugan. Ug ang labing pait mao nga ingon og sa walay kaso kini para sa atong kadagkuan.
Kay unsaon tuod pagsumpaki nga mismo ang Presidente nasayod niini. Siya pa gani ang nagpahibalo nato bahin sa gihimong kalapasan. Unya magpaabot ba kita nga silang mga ultimo sa gobiyerno nga mangisug ug mobanghag sa Presidente?(bobbygnalzaro@gmail.com)