SUPERBALITA CEBU

Serna: Nailad na sab ko...

Kyaw-Kyaw

Nalingaw kog paminaw sa una sa kanta sa Juan Paasa nga “Summoning Eru.” Kon di ka pamilyar, maglibog ka unsa ang maong kanta kay morag Inengles ang titulo pero morag Japanese rock song ang beat.

Nisiga akong mata sa usa ka parte sa chorus nga nagkanayon ‘Mamaghot, mamaak...’. Uy! Unsa god diay ning kantaha? And the rest is history.

Karong bag-o, nailad na sab ko sa ilang kanta nga 80’. Pero wa pa ko kahibalo nga mao nay titulo.

Nadungog lang nako ang kanta ug abi nakog Korean o Japanese ba. Mao nga nipaduol ko sa speaker ug didto nako nasuta nga Binisaya man diay ang lyrics.

Ahak ning banda nga Juan Paasa uy! Nalingaw ko ug ni-download dayon sa kanta. Unsa ba nga nahimo na man kong fan sa Juan Paasa? Di hinoon dautan.

* * *

Nagpadala diayg imbitasyon si Justin Irons sa ABS-CBN Corpcom bahin sa ipahigayon nga virtual media conference alang sa kanta nga “Magandang Dilag” nga nagamit niadtong pagpili sa Ms. Universe Philippines nga nadag-an ni Rabiya Mateo.

Ang guests ang mga artists mismo sa maong kanta nga si JM Bales ug KVN. Nindot unta “itambong” pero naa koy mga dinaliang kalihukan sa syudad karong adlawa.

Nangayo na lang ko, Justin, og materyal nga akong i-share ninyo sa umaabot. Atangi.

* * *

Sa ako nang nabatasan kada Dominggo, maglayatlayat ko sa mga channel ug moungot lang kon makatayming og numero nga makapasiga sa mata ang performance.

Nataymingan nako ang mga mananaug sa “The Clash” nga sila si Golden Cañedo, Jeremiah Tiangco ug ang bag-o lang nilampos nga si Jessica Villarubin (nikantag Habang May Buhay).

Sa akong tan-aw, kon maatiman lang og maayo, may kaugmaon si Jessica (usa gihapon ka Cebuana) isip performer. Kon wa ko masayop, regular na siya sa All-Out Sunday sa GMA 7.

* * *

Nataymingan usab nako si Rayver Cruz nga nikanta. Hala! Maayo man sab diay ni mokanta tawhana. Nainila man god si Rayver nga maayo mosayaw. Gani nakatutok kog dugay sa ilang sayaw ni Mark Herras (nga lisod ikauban sa esena kon sayaw na ang hisgutan).

Pila kini ka rason ngano nga magpondo ko sa balay kon Dominggo. Kana kon wa gyuy importanteng lakaw bisan asa sa lungsod o sa syudad. Di pa man god ta kagawas sa lalawigan nga sayonsayon ra.

Daghang kuti. Kuyawg mahutdan tag bawon nga salaping Pilipinhon kon mataymingan.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph