Usa ka suspek nga nag-atubang og pito ka mga kaso busa nagsige na lang og balik sa Cebu City Jail, nasikop na usab niadtong Miyerkules sa gabii, Enero 6, 2021.
Sa ikapito nga kaso, nasakmitan si Renato “Atoy” Baclaan, 30, taga Sityo Ponce 2, Barangay Carreta, Cebu City og 6 gramos nga shabu nga mobalor og P40,800.
Apan depensa ni Baclaan nga nanglabay lang daw siya og basura ug kalit siya nga gidakop.
Apan matod ni Police Lieutenant Freddie Barrientos, deputy station commander sa Parian Police nga nangulo sa buy-bust, si Baclaan napalitan gyud kini sa usa sa iyang mga operatiba.
Sa iyang unom ka kaso nga nalambigitan kaniadto, diin nagsugod kini sa 2007, niadtong tungora 16 anyos pa lang siya.
Unang kaso nga siya nalambigit mao ang pagpangawat. Unom ka buwan siya nga napriso.
Ikaduha ang paghingos og rugby samtang ikatulo ug ikaupat kasong kawat ug paghingos og rugby.
Ang iyang ikalima nga kaso nadakpan siya sa mga operatiba sa Dakbayan sa Mandaue human siya napalitan og drugas.
Napriso sulod sa duha ka tuig apan nakagawas human sa plea bargaining niadtong 2017. Sa samang tuig, laing kaso na usab ang iyang giatubang sa paghupot og drugas kon diin usa ka tuig siya na priso. (BBT)