NANGITA ka ba og sun, salt and sand (SSS) nga kasuroyan ug affordable ra sa bulsa?
Need a break? Ang Mactan Newtown Beach (MNB) maoy tubag sa inyong kahinam nga ma-relax ug ma-enjoy ang beach life.
Busa ilakip sa inyong listahan sa inyong planong suroyan ang Mactan Newtown Beach ang kanhi Portofino Beach nga nahimutang sa Sityo Angasil, Barangay Mactan, Dakbayan sa Lapu-Lapu.
New normal
Unang semana sa Septiyembre 2020 niabli pagbalik ang MNB human nga gipa-ubos ang dakbayan sa modified general community quarantine (MGCQ).
Temporaryong gipasira sa management ang beach area sukad niadtong Marso 21, 2020 human nga nipagawas og kamanduan ang lokal nga kagamhanan sa pagpahunong sa mga recreational activities ug establishment gumikan sa hulga sa coronavirus disease.
Sa pagbukas pagbalik gipaminusan na sab nila ang oras sa operasyon nga gikan sa 6:00 sa buntag ngadto na sa 7:00 sa gabii inay sa naandan nga moabot sa 10:00 sa gabii, Lunes ngadto sa Dominggo.
Si Dylan Ochea, reservation officer sa Mactan Newtown Beach, nipahibawo sa publiko o sa ilang guest nga 50 porsiyento lang sa ilang total capacity ang gitugotang makasulod.
Ang MNB adunay 400 person nga total capacity.
Gikinahanglan sab nga magsul-ob og mask ug face shield sud sa resort sama sa pathways, comfort rooms ug diha sa ilang tindahan.
Hubo-on lang kini kon mokaon ingon man kon maglangoy-langoy sa dagat.
Nag-monitor sab ang management niadtong grupo sa beachgoer nga magtapok aron masiguro nga mituman sa social distancing.
Gidili
Walay walk-ins ang gitugotan nga makasud, gikinahanglan nga nakapa-book nang daan aron nga makontrol sab ang gidaghanon sa guest.
Gidili ang pagdala og stove, butane, dagko nga speakers ug videoke machine.
Gikinahangl an sab nga wa nay maglangoy-langoy sa higayon nga molapas sa 7:00 sa gabii.
Rates
Gipahibawo ni Ochea nga ang entrance fee sa Lunes ngadto sa Biyernes mokabat sa P150, apan P200 sa Sabado ug Dominggo.
Kon makadala og identification card nga nagpamatuod nga lumad nga taga-lalawigan sa Sugbo, automatic maka-discount.
Libreng makasud ang bata nga adunay gitas-on nga 3.5 feet below, samtang P75 niadtong bata nga adunay gitas-on nga 3.6 feet ngadto na sa 4.5 feet.
Ang Mactan Newtown Beach adunay food stall o tindahan nga naninda sa inyong mga panginahanglan sama sa imnunon ug pagkaon.
Apan mamahimo ra gihapon ang guest makadala sa ilang kaugalingong pagkaon sa corkage fee nga P50 matag tawo nga adunay bitbit bisan pilay gidaghanon sa pagkaon.
Rentals
Sa kadtong dako nga grupo adunay dako nga tent nga mamahimong ka-abangan nga mosulod og 25 ka tawo sa tag-P3,000, gamay nga tent (15 pax) – P1,500, cabana (15 pax) P1,500, Parasol – P800, tables with chairs, P500.
Watersports
Tungod sa nasinateng krisis resulta sa pandemiya ang management mipakunhod sa abangan sa ilang watersports activities, nagkanayon si Ochea sa dihang nahinabi sa Superbalita Cebu.
Sa mahilig mag-jetski P1,500 ang abang sud sa usa ka oras nga gamit niini, gikan sa naandan nga P3,500.
Banana boat – P300 per person (5 – 7 person mamahimong makasakay) sud sa 15 minutos nga gamit.
Paddle board – P500 (gikan sa P600) matag tawo sud sa usa ka oras.
Unsaon pag-adto?
Gibana-bana nga anaa sa 45 minutos ngadto sa usa ka oras ang biyahe kon manukad sa kinapusorang bahin sa Dakbayan sa Sugbo.
Daghang paagi nga makasakay ilabi na sa public transportion kay way pribadong kasakyan.
Kon gikan sa duha ka mga tulay nga nagsumpay sa isla sa Mactan ug mainlaind Cebu adunay mga PUJs, E-Jeep, E-bus nga nag-rota og Soong-Mactan, pwede sab mag-taxi o Grab car.
Pag-abot sa Megaworld diin nahimutang ang Mactan Newtown diin makita ang mga tag-as nga establishment mao nay landmark nga duol na kamo sa beach.
Gikan sa main road sud sa beach area adunay 1.3 ngadto sa 1.4 kilometer ang gilay-on kon kaya magbaktas mamahimo ra apan adunay mga habal-habal sa area nga inyo sab nga kasakyan.
Sa mga nag-taxi mamahimong makalahos.
Sa mga nagdala og private vehicles dili maguol tungod kay adunay igong parking space.
Alang sa dugang inpormasyon bisitaha ang ilang official Facebook page nga Mactan Newtown Beach.