Bisan samdan ug nahagba na sa karsada, gitiwasan pa sa pagpusil tumong sa ulo sa gunman si retired Police Lieutenant Colonel Renato Malazarte, kanhi deputy director for operations sa Cebu Police Provincial Office (CPPO).
Si Malazarte, 54, gipusil sa riding in tandem samtang naglakaw sa sityo Mabuhay, Cabantan St. sa Barangay Luz, Dakbayan sa Sugbo padung sa iyang multicab pasado alas 10 sa buntag, Enero 8, 2021. Si Malazarte nagpuyo sa dapit.
Namatay si Malazarte paglabay sa mga 30 minutos sulod sa pribadong tambalanan diin siya gidala.
Matod sa usa ka saksi , kinsang ngan gipugngan ning mantalaan alang sa iyang seguridad, nga nahinabi sa Mabolo police, si Malazarte naglakaw dihang niabot ang duha ka mga tawo nga nag-angkasay sa usa ka motorsiklo nga itom.
Ang angkas nipusil kang Malazarte tumong sa dughan hinungdan sa pagkatumba sa kanhi sa police official sa karsada.
Human matumba, ang gunman nikanaug, niduol kang Malazarte ug nipusil kaniya tumong sa ulo.
Daling nibalik pagsakay ang gunman sa motorsiklo dayong sibat.
Gidala si Malarte sa mga personnel sa Emergency Rescue Unit Foundation (ERUF) sa tambalanan, apan namatay siya sa mga samad pinusilan.
Ang team sa Scene of the Crime Operation (SOCO) nakakuha sa dapit og usa ka slug ug tulo ka mga kabhang sa bala sa pusil nga wa pa matino ang kalibre.
Ang kapulisan nagpadayon pa sa imbestigasyon aron pagtino sa motibo.
Si Malazarte usa sa unang batch sa mga police official nga gilabay gikan sa Central Visayas ngadto sa Autonomous Region for Muslim Mindanao (ARMM) niadtong Agusto sa 2016.
Si kanhi Police Regional Office (PRO) 7 Director Chief Superintendent Noli Taliño niadtong higayuna niingon nga ang mao nga mga pulis dunay bati nga record, pipila kanila nalambigit sa illegal drugs.
Matod ni Taliño nga ang pagkalambigit sa mao nga mga pulis sa ilegal nga kalihukan nasusi sa Camp Crame sa wa gipakanaug ang hukom pagbalhin kanila.
Si Malazarte, niadtong 2017, nibalik sa CPPO aron paghikay sa iyang mga papelis alang sa sayo nga pagretiro.
Siya nanag-iya og usa ka restaurant sa Dakbayan sa Naga, diin siya dugay nga na hepe sa kapulisan. (AYB,GPL)