MOKABAT sa otso kilos kun dunay street value nga P9 milyon ang nakumpiska sa Philippine Drug Enforcement Agency (PDEA) Davao sa tuig 2020.
Si PDEA-Davao Director Antonio Rivera nagbutyag nga nagmalampuson sila sa kampanya sa Anti-Narcotics Agency sa Davao Region kontra ilegal nga druga.
Atol sa usa ka press conference sa nakalabay nga adlaw, gipresentar sa PDEA-Davao subay sa ilang report ang otso kilos nga shabu nga nagbalor sobra P9 milyon.
Giingon ni Rivera nga katambayayong nila ang nagkadaiyang yunit sa awtoridad sama sa Philippine National Police (PNP) ug Task Force Davao ingon man ang makanunayong pagpakabana sa katawhan sa komunidad.
Subay sa datus, ang PDEA-Davao nakahimo na og 1,660 ka mga anti-drug operations gikan bulan sa Enero ngadto Disyembre 2020.
Anaa sab sa 1,610 ka mga indibiduwal ang nadakpan sa mga anti-illegal drug operations samtang sa 2,162 ka barangay sa Davao Region, 369 na ang gideklarang drug-cleared barangay.
"Pinaka-importante ang paghatag og impormasyon sa komunidad, dako ang papel sa atong pagpakabana aron masumpo gyud nato ang ilegal nga druga sa palibot," ingon ni Rivera.
Usa sa gipaningkamutan karon sa PDEA-Davao nga modaghan pa ang mga barangay sa rehiyon nga madeklarang barangay-drug free. (Jeepy P. Compio)