MI-REPORT ang City Health Office sa Cagayan de Oro og 20 ka mga bag-ong kaso sa coronavirus disease (Covid-19) sa dakbayan.
Ang kinatibuk-ang ihap sa mga kumpirmadong kaso sa Covid-19 sa dakbayan anaa na sa 2,949.
Sumala ni Acting City Health Officer Dr. Lorraine Nery, sa 20 ka mga bag-ong lokal nga kaso, usa ang person deprived of liberty (PDL), upat ang mga close contacts sa mga pasyenteng nagpositibo sa coronavirus, upat ang mga authorized persons outside residence (Apors), ug 11 ang mga local index cases.
Sa 2,949 nga kinatibuk-ang kaso sa Covid-19 sa syudad, 404 ang mga returning overseas Filipino workers/locally stranded individuals (ROFs/LSIs) ug 2,545 ang mga local transmissions.
Matud ni Nery, sa 2,545 nga mga local nga kaso, 182 ang mga persons deprived of liberty, 1,480 ang mga local index cases, ug 1,065 ang mga local cases with link.
Ang Cagayan de Oro naay 304 ka mga active cases, 95 niini na-admit sa Northern Mindanao Medical Center ug uban pang mga ospital sa syudad, 205 ang mga outpatients, ug upat ang mga ROFs/LSIs.
Nakatala usab og walo ka mga Covid-positive nga mga kaso nga karon naka-recover human nagnegatibo ang resulta sa ilang repeat swab test. Anaa na karon sa 2,496 ang ihap sa mga nakarekober nga mga kaso sa dakbayan.
Sa maong numero, 291 ang mga LSIs, 108 ang mga ROFs, ug 2,097 ang mga lokal nga kaso (community: 1,766; Apors: 331).
Ang ihap sa mga namatay sa Covid-19 sa syudad naa na sa 149.