Basi sa labing ulahi sa pahibalo, wala na tay masaksihan nga Sinulog sa kadalanan. Mao nga nanawag ko sa mga higala nato nga may mga tinipigan nga video sa mga nanglabayng Sinulog. Akong tuyo nga sa balay na lang motan-aw sa sayaw sa Sinulog sa kadalanan agi og pahaom sa kapistahan ni Senyor Santo Nino ning tuiga.
Dili ikaglimod nga ang street dancing matag piyesta Senyor nga salmotan sa daghang contingent, nagbutang sa Sugbo sa mapa sa natad sa entertainment sa dugay nang panahon. Gidayo sa mga turista dili lang dinhi sa ato apil na ang mga langyaw nga nga nag gikan sa nagkadaiyang suok sa kalibutan. Wala pa ni labot sa mga balikbayan nga tuyong mamauli aron ilang ikauban ang ilang gikamingawan nga pamilya.
Sa laktod ang tinuig nga Sinulog ug mga relihiyosong kalihukan pahaum sa kapistahan nag-una nga attraction matag tuig diin minilyon ka mga tawo ang mosaksi. Dako kini og kahulogan dili lang sa espiritohanon nga aspeto, apil na ang pagpabaskog sa ekonomiya kay minilyon ka pisos man sab ang magbaha gikan sa bulsa sa mga bisita.
Nahinumdum ko nga may usa ka higayon nga gisugo ko og pa-book og hotel para sa duha ka bisita gikan sa Manila. Wala nay bakanting lawak. Fully booked ang mga hotel. Maayo nalang gani kay may usa ka pension house ang niabi abi para sa katapusang lawak nga bakante. Ingon niana ka baskog ang turismo sa nanglabayng katuigan.
Bisan ang mga mamaligya og kandila makapamatuod sa ka dako sa ilang kitaon niadtong mga panahona. Ang order sa lechon diin ang Sugbo usa sa giila nga pinaka lami nga tinubdan niini magbaha. Wala pa ni labot sa ubang pagkaon nga makapa buhi og maayo sa catering business dinhi sa ato.
Ang transport sector nga adlaw ug gabii nga magbahas bahas sa kadalanan himsog sab ang ilang patigayon tungod sa kadaghan sa mga bisita. Ang mga sidewalk vendors nga namaligya og mga prpdukto pahaum sa kapistahan alegre sab kaayo. Pulos nalang ta sa paghandom.
Ang pandemya maoy nakaingon niining tanan. Apan wala kini magpasabot nga wala nalang gyud tay buhaton aron pasalamatan ang Senyor nga niabot ta ning laing selebrasyon sa iyang kapistahan. Mao nga kadtong akong gipangtawgan nga naglakip sa video sa fluvial ug solemn procession maayo unta kong makaambit ko.
Kamo diha nga may karaang VHS o VCD sa mga kalihukan sa Sinulog kaniadto, agi og pahaum sa dili normal nga panahon manan-aw nalang ta kauban sa atong pamilya. Panahon sab ron nga kadtong nag negosyo niini mamaligya kay aron makapamalit kadtong gusto nga molili sa kagahapon sa Sinulog.
Sa internet mahimo sab ni nga i-download di ba? Hinuon gipahibalo sa taga Sinulog Foundation nga may video nga malantaw sa mga contingent nga mosalmot sa Sinulog 2021. Nindot ni nga paagi paglikay sa tinakdanay.