Nangolekta sugod Enero 7, 2021 ang Traffic Enforcement Agency of Mandaue (Team) og 10 porsyento sa pending nga mga multa sa mga public utility jeepney drivers ug operators una makakuha sa ilang Team clearance.
Ang Team clearance usa ka rekisito nga tan-awon sa Team, Land Transportation Office (LTO) o Land Transportation Franchising and Regulatory board (LTFRB) una makabalik og biyahe ang PUJ drivers ug operators.
Disyembre 2020 nagpahigayon ang Team sa ilang one-stop-shop diin iproseso ang tanang mga rekisito sa pagbalik na unya og biyahe sa mga jeep.
Gani, gihatagan og unom ka buwan nga installment sa pagbayad sa penalties sa PUJ drivers ug operators.
Kon dili mabayran dili maka-renew sa ilang Team clearance.
Sa pakighinabi sa Superbalita Cebu kang Edwin Jumao-as, bag-ong executive director sa Team, siya niingon nga gibuhat nila kini human nakita niya nga daghan ang niabusar sa installment.
Nakadawat si Jumao-as og reklamo gikan sa treasurer sa Team nga ang mga mokuha og Team clearance igo nalang mobayad sa P100 nga certification fee ug dili sa ilang pending penalties tungod sa gihatag nga lugway sa Dakbayan nga installment.
Matod niya nga adunay driver diin niabot og P89,000 ang penalty apan P500 lang ang gibayad.
Ang katuyoan sa Dakbayan nga hatagan og kahigayunan nga data-datahan ang penalty sa PUJ drivers ug operators tungod kay way igo nga ikabayad tungod kay hapit na sulod sa usa ka tuig sila nga wala makabyahe.
Apan, alang kang Jumao-as, kinahanglan nga ipatuman ang 10 porsyento nga pagbayad sa pending penalties.
Gani, ang wa pagsingil nila sa penalty pabor na sa mga driver ug operator tungod kay gikan sa 2015 ngadto sa 2020 nga mga violation lang ilang pabayaran.
Si Benjamin John Yu, PUJ driver nga nagrota og Liloan-Mandaue-North Bus Terminal, nisulti sa Superbalita Cebu nga nakabayad siya sa 10 porsyento sa pending violation sa ilang sakyanan nga P19,000.
Matod niya nga dili ingon bug-at ang pagbayad sa 10 porsyento kon itandi sa full nga iyang giangkon nga di makaya og bayad.
Apan ang importante lang niya nga makakuha siya og clearance aron makabiyahe na siyag balik sa Dakbayan sa Mandaue.