Gidid-an na ang tanan nga mga mananagat sa lungsod sa Sta. Fe, mga isla sa Bantayan, Sugbo sa pagpanguha og isdang danggit nga may gidak-on nga 9 sentimetros, mga itlog niini, apil na ang pagpanguha ug pagpamaligya atol sa ikaduha ug ikaunom nga adlaw kun new moon matag buwan.
Kini gibuhat aron masalbar ug maprotektahan ang supply, di lang sa danggit, lakip na ang pamilya niini sama sa pagatpaton, lahap, kitong, ngisi-ngisi, kadlitan, sugbago, chagbago ug suwahan nga makita sa kadagatan sa lungsod.
Si Celso Illustrisimo, pangu sa Municipal Fisheries and Aquatic Resources Management Council (MFARMC), nagkanayon nga ang maong mga klase sa isda maghatag og atraksyon sa mga turista.
“Tungod among nakita nga luoy kaayo ang gagmay nga mga danggit. Naay panahon na unya nga kon magpadayon gyud ni, maubos na ang mga danggit sa kadagatan sa Sta. Fe,” matod ni Illustrisimo sa Enero 8, 2020.
Ang ordinansa No. 03-2020 nga nag-ulohan og “Declaring a closed season or closed days for danggit and its related species, and prohibiting the catching of gravid and juvenile danggit,” gipasar sa Konseho sa Septiyembre 16, 2020.
Matod ni Illustrisimo, gisiguro niini nga napasabot daan ang mga residente ug mananagat aron kalikayan ang kalibog ug kagubot.
Ang lungsod sa Sta. Fe ilado di lang sa maanindot nga dagat apan kuhaanan usab sa abunda nga mga klase sa buwad ilabi na ang danggit.
“Well known kaayo gyud ang Sta. Fe sa boneless nga danggit mao nang hinungdan nga amo sab gipanghingusgan kaning pagpataka na sa mga gagmayng Danggit amo na nga ipahunong,” matod ni Illustrisimo.
Aron di maharos pagkuha bisan pa ang gagmayng isda, gidili na usab ang paggamit sa mga gagmayng pukot ug pamana.
Ang mosupak sa ordinansa mag-atubang og tukmang silot ug magmulta og P2,000 sa ika-tulong offense, P1,000 sa ika-duha ug P500 sa unang offense. / ANV