Ang Cebu City Government mouna og bakuna sa mga medical frontliner kay maoy labing bantang sa coronavirus disease (Covid-19) sa higayon nga makabaton na og vaccine ang Siyudad.
Si Mayor Edgardo Labella nipadayag nga iyang isunod ang military ug police personnel, senior citizens ug ika-upat ang poorest of the poor.
“The frontliners especially the medical frontliners who are really exposed must be given priority, military or the police personnel who are assigned there, senior citizens , then the poorest of the poor,” matod sa mayor.
Ang mayor mohatag og gahom sa mga barangay official sa paglista sa mga pamilya nga nalakip sa poorest of the poor sanglit sila ang nakaila sa ilang mga konstituwente.
Ang vaccine nga paliton sa Siyudad ihatag nga libre ngadto sa mga benepisyaryo.
Ang City Government mogahin og kapin o kulang P500 milyones para sa pagpalit og bakuna nga adunay labing menos 70 porsyento nga epektibo batok sa makamatay nga virus.
Ang Quezon ug Makati City nigahin og tag P1 bilyon para sab sa ilang kaugalingon nga lumolupyo nga maoy labing dako nga gigahing pundo para sa ilang mga konstituente.
Ang pundo maoy magsilbing dugang sa Siyudad sa vaccine nga ihatag sa national government nganhi sa Dakbayan sa Sugbo.
Nagtuo ang Siyudad nga di mapaigo ang bakuna nga igahin sa nasudnong kagamhanan.
Duna nay ubang mga local government unit (LGU) sa Sugbo nga mopalit og mga bakuna ubos sa pagpakigtambayayong sa Malacañang.
Ang labing uwahi nga nagpahibawo sa ilang plano mao ang Siyudad sa Lapu-Lapu ug Consolacion.
Ila usab nga prayoridad ang mga frontliner ug kadtong mga tawo nga way ikasarang sa pagpalit og bakuna.
Ang pagpalit gikinahanglang dunay koordinasyon tali sa nasudnong kagamhanan kay di mahimong modiretso ang LGU sa pagpalit. / PAC