Kon mosimba ka sa mga mass novena sa Basilica Minore del Santo Niño ning nag-angat niyang kapistahan, pagdala og quarantine pass aron di ka papaulion.
Sa unang adlaw sa novena, daghang mga deboto ang gipapauli sa kapulisan sa Dakbayan sa Sugbo kay wa magdala og quarantine pass.
Nimando si Mayor Edgardo Labella nga ipatuman ang odd-even scheme sa quarantine pass, hilabi na sa mga manimbahay sa Basilica Minore del Santo Niño.
Sama sa naandan, ang quarantine passes nga adunay tumoy nga numero sama sa 1, 3, 5, 7, 9 alang sa Lunes, Miyerkules ug Biyernes samtang ang 2, 4, 6, 8 alang sa Martes, Huwebes ug Sabado.
Kini aron malimitahan ug aron di magpundok ang mga tawo sa Basilica.
Sa Sabado, ang adunay mga quarantine pass gitugotan nga makagawas bisan kon odd o even ang tumoy sa ilang QR coded pass.
Kadtong mga trabahante ipakita lang ang ilang mga identification card (ID)
Samtang gipahibawo ni Mayor Edgardo Labella nga kadtong mga authorized persons outside residences (Apor) makasulod sila sa simbahan bisan kon wala silay quarantine pass.
GIPAPAULI
Si Cebu City Police Office chief, Colonel Josefino Ligan nikompirmar nga daghang mga deboto nga way quarantine pass ang ilang gipapauli.
Alas 2 palang sa kaadlawon naglinya na ang mga tawo nga gustong makauna sa pagsulod.
Usa sa hinungdan nga wa magdasok ang mga tawo mao ang pagpadala og Q-pass ug magpadayon kini hangtod matapos ang mga nobenaryo.
“Ang katong mga walay Q pass mao man na ang atong direktiba. Kon walay Q-pass dili makasulod sa simbahan. Mao to gipapauli,” matod ni Ligan.
Matod ni Ligan, usa sa hinungdan nga hapsay ang kalihukan sa Sinulog tungod kay napangandaman na sa taas nga panahon uban ang simbahan.
Kapulisan nihulagway nga han-ay ug malinawon ang unang adlaw sa novena mass.
Matod ni Ligan nga wa sila makatala nga adunay nabiktma sa mga kriminal sa sulod ug gawas sa simbahan.
Nakadayeg usab siya sa ka disiplinado sa mga tawo nga misubay gyud sa gipangbutang nga marka sa sulod ug gawas sa Basilica aron mamintinar ang social distancing. / PAC, AYB