Kinahanglan og negative nga resulta sa ilang coronavirus disease 2019 (Covid-19) test ang mga partisipante sa Sinulog ritual showdown kay kundi, di sila makaapil sa sangka sa sayaw.
Si Cebu City Mayor Edgardo Labella niingon nga ang nagpositibo nga partisipante sa usa sa mga grupo nga moapil sa indigay maoy nagtukmod sa City Government nga magpahigayon og testing sa mga moapil sa ritual showdown.
Kini, bisan pa man kon i-pre-record na ang mga sayaw sa mga partisipante.
Matod ni Labella nga aduna gihapoy hulga sa transmisyon sa sakit tungod sa mga pagpraktis.
“The participants in the virtual, in online, still gather together, there is still a possibility of contamination,” matod ni Labella.
Si Konsehal Joel Garganera, kinsa deputy chief implementer sa Emergency Operations Center (EOC), niingon nga pooled polymerase chain reaction (PCR) test ang ipahigayon ngadto sa mga partisipante.
Si Garganera niingon nga ang pooled testing kay ang pag-test sa lima ka swab samples dungan.
Nakig-alayon na si Garganera sa Sinulog Foundation Inc. (SFI) nga ibutang na og “bubble type” ang mga partisipante hangtod sa adlaw sa ilang pag-record sa sayaw.
Matod niya nga mabuhat ra kini tungod kay naay mga grupo nga mas gamay og partisipante.
Kalabot sa grupo nga adunay partisipante nga nagpositibo sa Covid-19, matod ni Garganera nga mamahimo gihapon nga makaapil ang grupo.
Miingon sad siya nga niadto pang Disyembre 29, 2020 last ni-report ang pasyente sa ilang praktis. / JJL