Patay ang retiradong pulis nga opisyal nga nadestino kaniadto sa Cebu Police Provincial Office human pusila sa riding in tandem sa Cabantan Street, sityo Mabuhay Mabuhay, Barangay Luz, Siyudad sa Sugbo pasado alas 10 sa Biyernes sa buntag, Enero 8, 2021.
Si retired Lieutentant Colonel Renato Malazarte, 45, kinsa giingong nalakip sa listahan ni President Rodrigo Duterte nga nalambigit sa ilegal nga kalihukan, namatay sa mga samad pinusilan sa ulo ug dughan.
Matod ni Police Master Sergeant Nicolo Gonzales, imbestigador sa Mabolo Police Station, nga duha ka mga lalake nga luwan sa itom nga motorsiklo niabot sa dapit, ang angkas nikanaog ug gi dul-itan si Malazarte sa pagpusil.
Upat ka mga sipang buto sa armas ang nadungog sa mga lumolupyo ug sa ilang pagsusi sa karsada, nag buy-od na si Malazarte nga wala nay panimuot.
“Base sa among information, duha daw ni ka tawo nga nagsakay sa usa ka motor nga itom daw, pero dili siya kabisado ug wala say plate number maoy mipusil aning a certain Rey Malazarte,” matod ni Gonzales.
Sigun sa mga silingan nga gikan nagkuha og basiyo sa butane canister si Malazarte aron ibutang sa iyang multicab panel nga maoy iyang sakyanan sa pag-deliver sa mga butane.
Wa siya nakabantay sa pag-abot sa duha ka mga killer.
Usa ka tindero nga di gustong nganlan nitug-an sa dihang nahinabi sa Superbalita Cebu nga human sa pagpamusil, nisibat dayon ang duha.
Unang gipusil si Malazarte sa dughan ug dihang natumba, nikanaug ang angkas nga gunman.
Niduol kini kang Malarte ug gitiwasan pagpusil sa ulo.
“Na shocked ko kay diha man sa akong atubangan gipusil. Mga duha to ka igo si sir sa iyang dughan ug ulo to naigo,” matod sa tindero.
Wa na siya makahulagway sa mga killer tungod sa kakalit sa hitabo.
Si Police Colonel Josefino Ligan, hepe sa Cebu City Police Office nga daling naabot sa lugar nga nahitaboan, nimando sa Mabolo police station nga palawman pa ang imbestigasyon.
Matod niya makig-alayon sila sa pamilya aron masuta kon aduna bay hulga nga nadawat si Malazarte.
“Subayon nato, unang una ang profile sa biktima. Then mismo ang pamilya pud para makakuha tag unsay dagan. Basig naa siyay mga threat,” matod ni Ligan.
Sa pagsuwat ning balita, wa pa silay motibo ug anggulo sa pagpatay, apan ilang tan-awon ang posibling may kalambigitan sa iyang pagka kanhi pulis hangtod na sa pag retire sa serbisyo.
Pasagdan lang una ni Ligan ang iyang mga sakop nga mohimo sa ilang imbestigasyon una pa sila moluwat og pamahayag.
MAAYONG TAWO
Mga silingan ni Malazarte nasubo sa iyang gidangatan nga ilang gihulagway nga buotan ug di abusado nga klase sa pagka pulis.
Matod nila nga sukad kini miretiro sa serbisyo si Malazarte, nagnegouyo na kinig butane ug adunay kan-anan sa Dakbayan sa Naga.
Si Malazarte lakip sa kapin 55 ka mga pulis sa Central Visayas nga gilabay sa Autonomous Region for Muslim Mindanao ug ubang bahin sa Luzon niadtong Augusto 2016.
Ang lakang gihulagway sa Police Regional Office (PRO 7) kaniadto nga internal cleansing.
Giingong “validated” sa Camp Crame ang background sa mao nga mga pulis.
Pagka 2019 nipahimulos siya sa early retirement ug misuporta sa kandidatora ni Senador Ronald “Bato” dela Rosa. /