Bisan ang recorded performance sa street dancing ug ritual showdown buot ipahunong sa Regional Inter-Agency Task Force for the Management of Emerging Infectious Diseases (RIATF-MEID) 7.
Ilang nakita nga bisan himuon kining virtual nga presentasyon unya sa Enero 17, 2021, mahulga gihapon ang mga sakop sa matag contingent kay magtapok lang sila gihapon sa ilang pag-perform sa barangay.
Matod sa RIATF 7 nga mas maayo nga ipakita na lang pagbalik o i-replay ang Sinulog performances sa nanglabay nga katuigan.
Sa usa ka resolusyon nga gipalabang sa mga miyembro atol sa ilang virtual meeting Enero 7, 2021, gikonsiderar sa RIATF 7 nga ang tanang pisikal ug aktwal nga performance-based Sinulog Festival activities sama sa Ritual Dance Showdown ug Street Dance Competition, ug uban pa nga hulga sa kaluwasan ug kahimsog sa mga mananayaw ug partisipante.
Mamahimo sab nga makadani sa panagtapok nga makahatag og higayon sa pagpanakod sa virus.
Matod sa RIATF 7 resolution nga bisan kon gilimitahan ang gidaghanon sa mga performers matag contingent o bisan pa ipaagi sa pre-recording sa videos sa performances, delikado gihapon alang sa publiko kay magtapok ug mag-interact man gihapon ang mga partisipante kon magpraktis ug sa aktwal nga recording kun shooting sa ilang sayaw.
Alang sa RIATF 7, dako ang posibilidad nga maka-mugna og daghang manan-away.
Basin mas lisod pa kini ikontrolar tungod sa limitado nga security personnel.
Ang Department of Health (DOH) 7 daan na nga nagsulti nga nakatala sila og tagduha ka digit nga ihap sa mga bag-o nga kaso sa Covid-19 sa Cebu City human sa nanglabay nga holiday celebrations sama sa Pasko ug Bag-ong tuig.
“Notwithstanding the mutual objective to preserve the culture and tradition of Sinulog, this time of global crisis calls for public health and safety to be the paramount priority of all,” tipik sa RIATF 7 resolution.
Ang resolusyon i-indorse sa RIATF 7 ngadto sa National IATF alang sa ilang impormasyon ug sibo nga aksyon.
Si Cebu City Mayor Edgardo Labella, sa iyang bahin, niingon nga kon mouyon ang National IATF, iyang ipakanselar ang tanang mga sayaw sa Sinulog. “If IATF will not approve, I will issue a cancellation,” matod ni Labella.
Samtang si Bise Mayor Michael Rama niingon nga iyang klaruhon una unsay naa sa resolusyon.