DUL-AN sa usa ka buwan, masubhan na ang talento sa higanteng si Kai Sotto sa G. League sa National Basketball Association.
Kini human gianunsyo nga nahukman sa management nga magsugod ang ilang G-League bubble sa Walt Disney World resort sa Lake Buena Vista sa Florida karong Pebrero 8, nga maoy giduwaan sa NBA, apan wala pay schedule nga gipagawas.
Adunay 18 ka mga teams ang mosalmot sa G-League bubble ug usa niini ang Ignite team nga maoy duwaan sa 7’2” nga si Sotto kansang team bag-ohay pang naumol para sa usa ka tuig nga development program para sa mga elite NBA draft prospects.
Sa 18 ka teams, walo kanila mo-advance sa playoff nga adunay single elimination.
Ikaduwa ni Sotto ang mga NBA veterans nga silang Michael Beasley, kinsa number 2 overall pick niadtong 2008, Lance Stephenson, Jeremy Lin ug Nik Stauskas.
“We worked closely with our teams, the basketball players Union, and public health experts to develop a structure that allows our teams to gather at a single site and safely play,” matod ni NBA G League President Shareef Abdur-Rahim
“We are thrilled to get back to basketball and to fulfill our mission as a critical resource for the NBA in developing players, coaches, referees, athletic trainers and front-office staff.” dugang sa Abdur-Rahim.
Ang G-League bubble gikatakdang mahuman sulod sa usa ka buwan diin wala sila mokorona og kampyon sa niaging season.
Ilang gisuspenso ang duwa niadtong Marso 12, usa ka adlaw human nisuspenso sab ang NBA agi og pagpakigbatok sa Covid-19 ug hingpit nikanselar sa mga duwa niadtong Hunyo. (PAC)