Ka sakit tan-awon sa mga post sa Cebu Road Heroes sa mga sakyanan nga naa nag-park sa mga bike lane. Makapahimangod kon huna-hunaon nga ang Cebu City Transportation Office (CCTO) nagsige og operate batok sa mga overnight parking, apan naay daghang mga sakyanan nga naghimo nga parking area sa bike lanes. Bugalbugal ni sa mao nga mga tawo sa proyekto ni Mayor Edgardo Labella.
Nakahibawo sila nga kini bike lane, di parking area sa mga sakyanan, apan naa gihapon nila gi-park ang ilang mga sakyanan. Basin wa sab ni sila kahibawo o nagpalinggoy linggoy lang, nagtuo nga makalusot kanunay sa mga enforcer. Kon kanunayon ang pagbadlong sa Siyudad aning mga tawhana, mopatuo ra ni sila sa ngadto ngadto.
Pareho ni sa panahon ni kanhi mayor Tomas Osmena nga ang mga nag counterflow iyang gipadakop. Sa ngadto ngadto nagkaminos ang mga tawo nga nagmotorsiklo ug four-wheeled nga mga sakyanan nga nadakpan. Sa ato pa, madisiplina ra ang mga drayber kon consistent ug di pilion ang pagpatuman sa balaud.
Sa psychology pa, gitawag ni og behavior modification. Usbon kon unsay naandan nga gibuhat sa tawo. Sa karsada naa ang abuso. Ang makausab mao ang estriktong pagpatuman sa balaud.
TRAFFIC SYSTEM
Gisugdan na sa pagtaud ang modernong traffic light system sa nag-unang mga eskina sa Dakbayan sa Sugbo. Kon nakakita ka nga dunay digital counter ang dan, mao ni ang sinugdanan sa modernong mga traffic light nga duna say imontar nga closed circuit television (CCTV) camera.
Lahi ni nga traffic system kon itandi sa ubang mga siyudad sa Metro Cebu. Ang nakalahi kay di ni siya naandan nga suga lang. Duna kini mga sensor nga gipataban. Mao ni nga gikawtan ang mga daplin sa karsada nga lubngan sa mga kable. Wa ko makahibawo sa kinatibuk-ang detalye, lahi sa una nga ako rang mateksan ug matawgan ang kanhi head sa CCTO nga si Isko Ouano. Motubag man dayon to.
Gikinahanglan na kaayo ang modernong traffic system kay outdated na kaayo ang naa karon sa Siyudad. Niadto pa ning late 80s. Sa ato pa, mga upat na tawon ka dedaka nga wa mailisi.
KINABUHI
Naa lang koy nabantayan sa mga enforcer. While busy sila sa pag-manage sa traffic, ilang natutokan og maayo ang pagtan-aw sa mga sakyanan nga di maghuot sa dalan. Ilang nalimtan nga importante ang kinabuhi sa mga pedestrian kay sa mga sakyanan. Ang akong pasabot nga panalipdan usab sa mga enforcer ang kinabuhi sa mga tawo nga nanabok sa dan, labina sa pedestrian lane.
Kadaghan na ko makakakitag lalis sa mga drayber sa mga sakyanan nga mangliko sa eskina sa dan P. del Rosario ug Junquera nga magpakusog bisan go sa pedestrian ang pagtabok. Tan-awon lang sa mga enforcer, gawas niining babaye nga iyang palabangon og una ang mga pedestrian una ang mga sakyanan. Mao nay sakto. Unaha ang kinabuhi sa tawo.