Way imposible sa Ginuo

TUTOK SA GUGMA: Nagtinutokay sila si Wilce ug Cara Marie Enriquez samtang nagpahiyomay sa usag-usa human sa seremonyas sa ilang kasal sa Sto. Tomas de Villanueva Parish sa Barangay Poblacion Pardo, dakbayan sa Sugbo niadtong Oktubre 24, 2020. / tampo nga hulagway
TUTOK SA GUGMA: Nagtinutokay sila si Wilce ug Cara Marie Enriquez samtang nagpahiyomay sa usag-usa human sa seremonyas sa ilang kasal sa Sto. Tomas de Villanueva Parish sa Barangay Poblacion Pardo, dakbayan sa Sugbo niadtong Oktubre 24, 2020. / tampo nga hulagway

DAGHAN og mga plano sa kinabuhi ang tawo.

Adunay matuman dihadiha. Aduna usay unya pa mahitabo.

Sama kini sa sugilanon sa bag-ong magtiayon nga sila si Wilce ug Cara Marie Miculob-Enriquez.

Natakda na unta sa Mayo 9, 2020, ang ilang kasal sa simbahan.

Kini tungod kay manguliay ang tiya ug tiyo ni Wilce gikan sa Estados Unidos ug ang kuya niini nga tua sa Singapore.

Gani, ang maong petsa maoy naukit sa ilang wedding ring.

Apan matod ni Cara, sama sa gikaingon, ang tawo maoy moplano, apan ang Ginuo maoy mohukom.

Wa mahitabo sa maong adlaw ang ilang kasal gumikan sa lockdown dala sa pandemiya.

Napu ka tuig na ang nakalabay, dihang una sila nagkahimamat sa simbahan sa Barangay Poblacion Pardo, siyudad sa Sugbo.

Ang duha mga miyembro sa Youth Ministry sa Catholic Charismatic Renewal Movement.

Nagsugod sila isip managhigala hangtod nga nipadayag si Wilce sa iyang gibati ngadto sa dalaga.

Sa paglabay sa katuigan, nakahukom ang duha nga dad-on sa sunod nga level ang ilang relasyon, ang maghimo og pamilya.

Niadtong Disyembre 25, 2019, ni-propose si Wilce kang Cara.

Tungod kay nauswag ang ilang kasal, nagpaabot sila nga mokunhod ang mga kaso sa Covid-19 sa siyudad sa Sugbo.

Niadtong Oktubre 24, 2020, nahitabo ang ilang labing gipaabot, ang makasal.

Pipila ka adlaw sa dili pa ang ilang wedding day, nabalaka sila nga uwanon ang ilang kasal labi na sa garden ang ilang reception. Ang weather forecast nianang semanaha kay mag-uwan. Gibalita usab nga dunay low pressure area ug nag-uwan og maayo usa ka adlaw sa dili pa ang ilang wedding day.

“But with God’s grace, pagmata nako pag-check nakos langit, wa juy uwan ug dag-om... Nakaana gud kong Wilce, “palangga jud tas Ginuo.” Grabe jud tong inampoay namo,” asoy ni Cara.

Sila nakasal sa Sto. Tomas de Villanueva Parish, diin sila unang nagkaila.

Mga miyembro sa isig ka pamilya ug suod nga mga higala ang nisaksi sa ilang pagbinayloay sa mga saad sa usag-usa ug sa ilang “I do”.

Human sa seremonyas sa kasal, gisunod ang reception sa Villa Esperanza Gardens sa siyudad sa Sugbo.

Burgundy red ug rose pink ang motiff sa ilang kasal. (SCG)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph