KADAGHANAN sa tibuok kalibotan ang dili makasabot nganong dunay mga Amerikano nga nagtuong gitikasan si Presidente Donald Trump sa American bisan pa man walay nakitang mga pruweba ang iyang mga paninguha nga mangita niini.
Ibutang nato nga gahi lang gyud og ulo kini si Presidente Trump. Siya ang tawo nga wala makadawat sa kamatuoran.
Apan nganong linibo man sab ang mga Amerikano nga nituo kaniya? Ingon niana kadaghan ang mga hanggaw didto sa Estados Unidos?
Gani, gatosan ka libo ang nagrali didto sa kaulohan sa Estados Unidos ug nisulong mismo sa Capitol aron mababagan ang pagdesisyon sa Kongreso nga si president-elect Joe Biden ang nakadaog sa eleksyon sa maong nasud sa miaging Nobiyembre 2020.
Nisiga pa gyud ang akong mga mata dihang atong nasayran nga ubay-ubay ang mga Pilipino nga nikuyog sa pagsulong sa Capitol building sa Wanghington DC.
Panatiko
Nakahinuktok ko, ingon niini ba sab kadaghan ang mga panatikong hanggaw nga naa pa dinhi mismo sa Pilipinas?
Daw subo palandungon nga ubay-ubay baya gyud ang nia sa Pilipinas nga motuo og mga fake news. Unya, kon pakit-on og mga hulagway aron mapamatuod ang gibuhat sa usa ka tawo, mosimang dayon og ingon nganong hilig magpahulagway?
Bisan pa man sa kagamay sa iyang budget, gitutokan karon ni Bise Presidente Leni Robredo ang pagtabang sa mga naapektuhan sa lain-laing mga katalagman nga niigo sa Pilipinas.
Apan nasuko hinuon ang mga tigsuporta ni Presidente Rodrigo Duterte. Ngano daw hilig magpahulagway si Leni sa mga maayong buhat niya?
Dunay usa ka DDS nga niinsister nga mas daghan ang mga kaayohan nga nahitabo ni Presidente Duterte apan wala kini magpahulagway.
Wala makatubag ang hanggaw dihang gipangutana unsa man kining maong mga kaayohan?
Cha-cha
Gibanhaw sa pipila ka mga kongresista ang tinguha nga usbon na sab ang Konstitusyon kay mao kunoy gikinahanglan karon.
Ah, nakalimot ba kining mga amaw nga naa pa kita taliwala sa usa ka pandemic? Nakalimot ba kita nga samtang ang ubang mga nasud nag-apod-apod na sa mga bakuna, dinhi sa atua karon pa gyud Marso ang giingong unang mga bakuha nga moabot alang sa populasyon?
Kon duna man ganiy natusokan, ginamit niini ang mga smuggled nga bakuna ug ang nag-unang nigamit niining mga illegal nga gipayuhot mao mismo ang PSG nga nagbantay sa Presidente? (@anol_cebu sa Twitter)