‘Labing dakong supplier’ sa drugas nadakpan

GIKONSIDERAR sa kapulisan nga usa sa labing dako nga tinubdan sa drugas sa Barangay Duljo Fatima, Dakbayan sa Sugbo nadakpan niadtong Biyernes sa gabii, Enero 8, 2021 sa buy-bust sa mga sakop sa Drug Enforcement Unit (DEU) sa Mambaling Police Station sa Cebu City Police Office (CCPO).

Si Police Major Dindo Juanito Alaras, hepe sa Mambaling Police Station, niila sa ilang dinakpan nga si Roger Ongcoy, 43, ug amahan nga si Nicasio Ongcoy, 66.

Matod ni Alaras nga atol sa ilang buy-bust, nasakmit gikan sa mga Ongcoy ang shabu nga moabot og 605 gramos ga mokantidad og P4.1 milyones base sa Dangerous Drugs Board (DDB) value.

Dugang ni Alaras nga matawag nga ang mga Ongcoy regional high value individual tungod sa gidaghanon sa shabu nga nasakmit.

Matod ni Alaras nga ang igsuon ni Roger nga si Richard, inahan nga si Luzviminda ug kapuyo anaa usab napriso sa Cebu City Jail sa Barangay Kalunasanan.

Gituohan ni Alaras nga ang shabu nga nasakmit nila gikan sa amahan ug anak pangsuplay sa karon nga semana sa ilang mga parokyano sa mga kasikbit nga mga barangay sa Duljo Fatima ug uban pa.

DISKARTE

Si Roger, sa iyang habig, niangkon nga ang shabu iya ni Richard, kinsa nanawag kaniya ug lahi na nga tawo nga sinaligan sa iyang igsuon maoy nihatod.

Depensa ni Ongcoy nga igo ra siya binlan sa shabu samtang duna lay mokuha niini sa ilang balay.

Samtang ang amahan ni Roger nga si Nicasio miinsister nga wa siyay kalabutan sa ilegal nga kalihukan sa iyang anak.

Matod niya napagan lang siya sa pagdakop sa iyang anak.

Apan una nang gitug-an ni Nicasio nga ang iyang asawa atoa na sa sulod sa prisohan napriso na usab.

Ang grupo ni Alaras midepensa usab nga si Nicasio maoy dunay labing dako nga kasayuran sa drugas sanglit apil man siya nga mohatag o mobaligya kon wala si Roger.

Gidugang ni Alaras nga anaa sa dagko nga bulto ang duwa sa mag amahan tungod kay dili mobaligya kon di dinagko ang paliton sa kustomer gikan kanila.