KASO nga falsification of public document ang posibleng atubangon sa usa ka 29 anyos nga lalake nga nadakpan nga namaligya og peke sa quarantine pass sa mga manimbahay sa Basilica Minore del Santo Niño sa Sabado sa buntag, Enero 9, 2020.
Ang suspek nasikop sa mga sakop sa City Environment Sanitation Enhancement Team (CESET) sa entrance sa Basilica sa dan Magallanes, Barangay Santo Niño.
Si Arniel Putot, 29, taga Lower Kawayan, Barangay Sambag 2, Siyudad sa Sugbo, naaktuhan sa mga taga Ceset nga sekretong namaligya og quarantine pass sa mga manimbahay.
Ang pass gi-photocopy gikan sa orihinal. Gawas niini, namaligya usab siya og face mask ug faceshield.
Si Police Chief Master Sergeant Rainer Mahinay sa Waterfront Police Station niingon nga 13 ka mga quarantine pass ang nakuha gikan kang Putot.
Kini iyang gibaligya sa tag P20 matag usa.
Si Putot kasamtangan nga napriso sa Waterfront Police Station sa Cebu City Police Office samtang ang Kagamhanan sa Dakbayan sa Sugbo maoy mopasaka og kaso.
Si Grace Luardo, pangu sa Ceset nga nahinabi sa Superbalita Cebu nibutyag nga magpaabot pa siya sa kamanduan sa legal department sa Dakbayan.
Ang iyang buhatan maoy mobarog nga reklamante sa kaso.
Matod ni Luardo nga ang iyang sakop maoy nakabantay nga apil ang quarantine pass nga gipamaligya ni Putot hinungdan nga nangayo sila og tabang sa mga pulis sa pagdakop sa suspek.
“Quarantine pass gyud ang iyang gipamaligya. Anaa iyang pangalan. Iya usab nang giangkon nga iyang gipa xerox ang maong papel aron ibaligya,” dugang ni Luardo.
Nagtuo si Luardo nga daghan na ang ang nakapalit sa quarantine pass tungod kay 13 nalang ang nahabilin.
“Wala siya motug-an kon pila ang iyang gipa xerox gyud actually,” matod ni Luardo.
Si Putot, sa iyang habig, nisulti sa Superbalita Cebu nga naingganyo siya sa pagpa-photocopy sa quarantine pass nga matud pa iyang nakit-an sa Sabado sa kadlawon samtang namaligya og faceshield.
Matod niya nga usa ka traffic enforcer ang iyang nadunggan nga niingong mas maayo pa nga mamaligya og quarantine pass.
Tuod man nianang adlawan na. siya nakahuna-huna nga mamaligya ilabi na nga gamay pa ang iyang halin sa faceshield.
Ang quarantine pass nga iyang nakit-an iyang gipa photo copy sa tag P2 ug 15 ka buok ang iyang gipakopya.
Sa wa pa siya madakpi, duha ka tawonga taga Dakbayan sa Mandaue ang iyang gibaligyaan human nga wa pasudla sa simbahan sa Basilica Minore del Santo Niño.