WA NAY ipahigayon nga ritual showdown Sinulog bisan pa og pre-recorded.
Si Cebu City Vice Mayor Michael Rama, sa press conference nga gipahigayon sa Sabado, Enero 9, 2021, niingon nga ipahunong na sab ang pagpahigayon og mga praktis.
Ang Sinulog Foundation Inc. (SFI) ug steering committee sa Sinulog 2021 nga gipangulohan ni Rama, nakahukom nga i-postpone nalang ang mga kultural nga kalihukan sa kapistahan ni Sr. Santo Niño.
Ibalhin kini ngadto sa Abril atol sa selebrasyon sa ika 500 nga kasumaran sa pagka Kristiyanos sa Pilipinas.
“To have all activities in the ritual competition to be put on hold and have it postponed,” matod ni Rama.
Ang ritual showdown nga pre-recorded unta ipakita pinaagi sa online sa adlaw sa Sinulog, Enero 17, ikatulo nga Dominggo sa Enero.
Si SFI executive director Elmer “Jojo” Labella niingon nga ang Cebu Archdiocese magpahigayon og binuwan nga selebrasyon sugod sa Abril alang sa ika-500 nga tuig sa pagka Kristiyanos. Si Labella, kinsa igsuon ni Mayor Edgardo Labella, niingon nga atol niining selebrasyon, iapil ang “quincentennial Sinulog.”