WELDER wa mo-overtime kay naghinam hinam nang makigtagbo ug makig-sex sa iyang kanhi hinigugmang babayeng minyo, inay motel masudlan, detention cell na hinuon kay siya nadakpan sa entrapment operation sa kapulisan human gireklamo sa babaye sa iyang pagpakatap sa ilang sex video.
Ang suspek giila ni Police Staff Sergeant Ronelle Jay Ocariza, imbestigador sa Regional Anti-Cyber Crime Unit (RACU) 7 nga si Erwin Baricuatro Abellanosa, 30, dunay kapuyo, taga Barangay Dakit, lungsod sa Pinamungajan, Sugbo.
Ang entrapment operation nga gipahigayon sa kilid sa usa ka tindahan sa dalan Colon, Dakbayan sa Sugbo sa alas 3:30 sa hapon sa Biyernes, Enero 8, 2020 hiniusang gilusad sa RACU-7, 1st ug 2nd Provincial Mobile Force Company (PMFC) ug Women and Children Protection Desk (WCPD) sa Cebu City Police Office (CPPO).
Matod ni Ocariza nga si Baricuatro wa na mo-overtime, nagdali-dali sa paggawas sa iyang gitrabahoan sa dakong kompaniya sa lungsod sa Balamban aron makaanhi sa Dakbayan sa Sugbo.
Bisan gibuwagan, nagsige kini og panghulga ug gipakatap ang ilang sex video sa babaye pinaagi sa Facebook Messenger.
Wa masayod si Baricuatro nga nisumbong na si Elaine (di niya tinuod nga ngan) sa kapulisan niadtong Huwebes.
Nasabutan nga patuohon si Baricuatro nga si Elaine mosugot na lang aron di na ipakatap ang ilang sex video ug di dayunon ang hulga nga patyon ang pamilya sa babaye.
Naghuwat sila si Elaine ug kapulisan kang Baricuatro ug sa pag-abot ug pagduol niya sa iyang ex-GF, gidakop dayon siya.
Matod ni Ocariza nga dihang gidakop si Baricuatro, nialigar siya nga igo lang siyang maningil sa kwarta nga ilang ginegusyo nga gipatanto ni Elaine.
Dihang gipakita sa iyang gihimo pagpakatap sa sex video, ingon man hulga sa biktima, ningaab og hilak si Baricuatro.
“Nagluhodluhod ang suspetsado sa paghilak. Nangayog pasaylo sa babaye. Nipadayag nahimo niya tungod sa iyang gugma niini,” asoy ni Ocariza.
Iyang gihulagway nga daw sama sa telenobela sa telebesyon dihang nag-abot ang duha, apan wa pasayloa ni Elaine, iya kining pasakaan og kaso.
Si Ocariza niingon nga si Elaine, 34, nangayog abag kanila niadtong Huwebes. Siya giuban sa iyang bana, igsuon ug kabanay aron ireklamo si Baricuatro.
Si Elaine nisaysay nga wa na siya mopauli sa ilang barangay sa dakbayan sa Naga human si Baricuatro nipakatap sa ilang sex video.
Gipang-send usab ni Baricuatro ang mga hubo nga hulagway ni Elaine pinaagi sa Facebook Messenger sa ilang mga kabanay ug higala.
Kasong kalapasan sa Republic Act (RA) 9262 kun Violence Against Women and Children Act ingon man kalapasan sa Republic Act 9955 kun Anti-Photo and Video Voyeurism Act 0f 2012.