HUMAN makadawat og mga hungihong, tutokan na unya sa pangu sa Traffic Enforcement Agency of Mandaue (Team) ang mga enforcers nga mudawat og suhol sa mga traffic violators.
"Sa pag-asumar nako isip Team executive director kay limpyohon nato ang hearsay or ato nalang ingnon korakot," sigon ni Edwin Jumao-as ang pangu sa Team.
Tungod karong tuiga lang ni-asumar si Jumao-as isip executive director sa Team, wala pa siyay ideya kung kinsa nga mga enforcers ang mga mudawat og suhol.
Miingon si Jumao-as sa Superbalita Cebu nga siya mismo ang mangunay sa pagtan-aw og pag-imbestigar kung unsa ka tinuod ang iyang nadawat nga mga hungihong.
Apan sa miaging tuig aduna nay nasuspenso nga mga enforcers human napamatud-an nga midawat kini og suhol.
Ang plano ni Jumao-as nga maghimo siya og internal rules sa ilang buhatan nga adunay first violation ug atbang nga silot o depende sa gibug-aton.
"Pero ang akong recommendation kay tang-tangon gyud sya sa trabaho," sigon Jumao-as. (KFD)