USA ka hamtong nga lalake ang namatay sulod sa 180 Degrees Rehabilitation Center nga nahiluna sa dalan P. Sanchez, Barangay Pagsabungan, dakbayan sa Mandaue niadtong Huwebes, Enero 7.
Ang namatay mao si Julius James Sison, 39, taga Purok 8, Barangay Proper Camputhaw, dakbayan sa Sugbo.
Sa pakighinabi sa Superbalita Cebu ni PMaj. James Conaco, ang hepe sa Basak Police Station, miingon nga nakadawat sila og taho gikan sa Consolacion Police Station nga usa ka gi-rehab namatay human natagak sa ikaduhang andana sa rehabilitation center.
Sa blotter report sa kapulisan, gibasi sa gihatag nga detalye sa 180 Degrees Rehabilitation Center, si Sison gidala sa Mendero Medical Center apan gideklara na nga dead-on-arrival (DOA).
Matod ni Conaco, nangutana ang Consolacion Police Station niya kon habog ba ang maong rehabilitation center nga makabsan gyud sa kinabuhi ang matagak niini.
Apan, matod ni Conaco, nga ang maong rehab center usa lang ka balay nga gihimo nga center ug gikan sa ikaduhang andana paingon sa ubos nagsukod lang og 10 ngadto sa 12 feet.
Gipahibawo sab si Conaco sa Consolacion Police Station nga ang biktima nakaangkon og daghang bun-og sa iyang lawas, usa ka black eye, ug dinunggaban sa iyang tiil. Nakita sab sa lawas sa biktima nga adunay mga lagom nga inagian sa bunal o tubo nga taas ug four inches ang gibag-on niini.
Mi-take over na ang Basak Police Station sa imbestigasyon ug miadto sila sa rehab center ug mipahigayon og mas lawom nga imbestigasyon apan dili mo-cooperate ang mga kawani gani, wala sila pasudla sa maong center.
Niadtong Enero 8, gipahibawo sa Basak Police Station ang inahan ni Sison nga si Teresita Sison sa nahitabo sa iyang anak.
Tungod sa lainlaing hungihong sa hinungdan sa kamatayon ni Sison, ni-request si Conaco og autopsy ngadto sa usa ka medico-legal aron matumbok gyud kon unsay gikamatyan niini.
Kon mogawas na ang resulta sa autopsy, mao na kini ang basehan sa inahan sa biktima kon unsa nga aksyon ang ilang buhaton bahin sa kalit nga kamatayon sa ilang anak.
Kasamtangang, gihaya ang lawas ni Sison sa St. Peter Imus branch.