LIVE coverage matag Sinulog. Usa ni sa dili malimtan nga tahas sa matag reporter ug anchor person sa matag Piyesta Senyor. Mao sab ni ang akong gikamingawan nga gimbuhaton sa radyo ug telebisyon. Kinsa bay di mingawon sa mga prosesiyon matag kaadlawon. Ang Traslacion. Ang fluvial procession, ang reenactment ug ang solemn procession.
Wala pa ni labot sa mga santos nga misa ug ubang kalihukan sa Basilica. Sa grand parade, diin magsul-ob na sa pinatuyo nga desinyo sa t-shirt alang sa coverage nga gilamasan sa mga burloloy pahaum sa festival, kini maoy labing kulbahinam nga bahin sa coverage.
Blow by blow coverage ang tawag sa uban. Gikan sa santos nga misa nga maoy mobukas sa kalihukan hangtod na sa pagsalida sa karsada sa contingents. Ang kainit sa panahon di panumbalingon mahatod lang ang buhing paghulagway. Usahay ulanon. Ang pinakakapoy nga bahin sa coverage mao ang binaktasay nga wala didto ug wala diri. Tibuok adlaw ka nga magbaktas sa pagsige og sunod sa mga contingent. Wala pa ni labot sa kahuot sa mga agianan.
Unya ang mga reporter nga gitahasan sa pag-monitor sa kalinaw ug kahusay. Ang alarma sa mga ginagmay nga krimen apil na ang huboghubog. Di madahan sumala pa. Samot na sa pagka gabii nga manggimok na ang mga nakainom.
Ang coverage diay sa karsada mahuman lang kon ang tanang contingents tua na sa sulod sa sports center. Anhi na dinhi makaginhawa ang mga reporter sa field. Ang announcement sa mga mananaug usahay ipakapin.
Pipila lang ni sa mga gimbuhaton kon maghisgut ta og coverage panahon sa kapistahan ni Senyor Santo Nino kaniadto.
Tungod sa pandemiya, kutob nalang ta sa paghandum. Makamingaw alang sa mga nalambigit ning maong trabaho. Sa usa ka bahin sa akong kuwarto, nagbitay ang daghan kaayong identification card kun media pass. Sa kadaghan nga akong gitigom ug gitipigan naglabi ang ID sa Sinulog.
Apan wa tuyoa nga sa akong pagsulingsuling nasagul didto ang pinakakulba nga pass. Ang unang quarantine pass nga giapud-apod sa city hall. Ako gihapon ning tipigan hangtod hangtod.