Barrita: Sinulog 2021 ritual showdown ipadayon?

ANG Sinulog Foundation Inc. (SFI) ug ang Sinulog 2021 steering committee nga gipangulohan ni Cebu City Vice Mayor Michael Rama mioktaba sa tanang cultural activities sa Sinulog 2021, lakip na sa ritual showdown, nga gitakda unta sa Enero 17.

Ang una nilang plano mao nga i-record kini ug isalida sa telebisyon ug sa social media karong Enero 17. Karon nga gioktaba na kini, wa nay rehearsals alang sa 21 ka contingents nga mosalmot unta sa Sinulog-based ug free interpretation categories.

Matod ni Rama, ang pag-oktaba sa Sinulog cultural activities maoy tampo sa Sinulog organizers aron di mokatap ang mananakod nga coronavirus disease 2019 (Covid-19). Way rehearsal, way takod. Way ritual showdown, way takod.

* * *

Sa ato pa, wa na gyuy Sinulog sa Enero 17 kay gi-postpone man. Apan si SFI executive director Elmer “Jojo” Labella niingon nga ang Archdiocese of Cebu mopahigayon og binuwan nga selebrasyon sugod sa Abril alang sa ika-500 ka tuig sa Kristiyanismo sa Pilipinas.

Si Jojo, igsuon ni Cebu City Mayor Edgardo Labella, niingon nga ilang isal-ot ang “quincentennial Sinulog” sa maong selebrasyon, uban sa Cultural and Historical Affairs Commission, City Tourism Commission ug sa cultural group sa siyudad sa Sugbo.

Ang Regional Inter-Agency Task Force (IATF) for the Management of Emerging Infectious Diseases maoy nirekomendar nga ihunong ang tanang actual ug physical performances sa Sinulog tungod sa Covid-19 pandemic.

* * *

Malipay kita nga gisanong kini sa organizers sa Sinulog. Ang Cebu City nga kaniadto giingon nga epicenter sa coronavirus nahimo na karon nga modelo sa pagkontrolar niini.

Si Rama niingon nga ang labing ulahing data sa siyudad sa mga kaso sa Covid-19 usa sa ilang gibasihan sa ilang desisyon. Sa Enero 8, ang Emergency Operations Center (EOC) sa siyudad nakatala og 49 ka bag-ong kaso sa Covid-19, ang labing taas sa pagsugod sa tuig. Sa Enero 9, nisaka kini ngadto sa 59.

Morag naghuwat lang ang Covid-19 nga dunay mga tawo nga magtampunsisok. Kon manayaw tag Sinulog, magyapayapa ang coronavirus disease sa kalipay kay mas daghan siyag mapatakdan.