KIDAPAWAN CITY -- Diriyot na nga matukob ang usa ka bata sa banakon o King Cobra sa Makilala, North Cotabato alas 2:00 sa hapon, Dominggo, Enero 10.
Matud ni Marlina Hamules nga daghan sila nga naglakaw sa kalsada sa Barangay New Israel sa maong lungsod sa dihang kalit mitabok ang dako kaayo nga banakon.
Tungod sa kahadlok, halos wala sila makalihok, apan ang uban nanagan pabalik sa ilang agi.
Apan usa ka bata nga nagpangedaron og 10 anyos ang mikuha'g kahoy apan naalinggatan kini sa halas diin iya na unta kining paakon.
Apan abtik nga milikay ang bata ug naunhan niya sa pagpuspos sa ulo ang King Cobra.
Patay gilayon ang lala nga banakon ug wala na kini makalihok nga sentrong naigo sa ulo.
Dako ang pasalamat sa mga molupyo sa gipakita nga kaisog sa bata sa pagpatay sa King Cobra.
Kahinumdoman nga daghan nang mga tawo ang napaakan og banakon sa probinsiya apan uban sa mga halas napatay usab.
Nagpasidaan ang mga lokal nga opisyal sa North Cotabato sa mga namuyo ilabi na kadtong duol sa tiilan sa Mt. Apo nga dili mokompiyansa sa subling pagpanggawas sa King Cobra. (Edgar E. Fuerzas)