NAKABSAN sa kinabuhi si Libungan Mayor Christopher "Amping" Cuan sa North Cotabato human nga gipusil alas 11:00 sa buntag Lunes, Enero 11, 2021.
Sumala sa taho sa pulis, sayo pa nga milibot si Cuan sa iyang mga proyekto sa Barangay Cabaruyan, Libungan sa dihang girakrakan kini og wa mailhing armadong lalaki gamit ang tag-as nga matang sa mga armas.
Nadala pa ngadto sa balay tambalanan ang mayor ug ang iyang drayber nga si Erwin Ihao apan namatay gihapon sila human makaangkon og daghang mga igo sa nagkadaiyang bahin sa ilang lawas.
Nahinumdoman nga una nang gisulayan og patay si Cuan sa atubangan sa municipal hall sa lungsod niadtong nakalabay nga tuig apan wala maigo.
Giangkon mismo sa kanhi mayor nga daghan siyang nadawat nga hulga sa kinabuhi apan wala siya mahadlok kay wala siyay atraso o kaaway.
Sa pagsuwat ning balita, padayon ang imbestigasyon sa kapulisan Libungan Municipal Police Station sa pagpusil patay sa mayor.