GIKLARO ni Mandaue City Mayor Jonas Cortes nga wala silay gipaburan nga mga dagkong operators sa pampublikong transportasyon nga mubyahe sa dakbayan.
Kini human miingon ang mga tricycle drivers nga mas gipaburan ang mga bus tungod mao na kini ang nagdagan sa ilang naandang rota samtang sila anaa na lang sa mga eskinita.
Atol sa gipahigayong welga sa mga miyembro sa Pinagkaisang Samahan ng Tsuper at Operators Nationwide (Piston) Cebu chapter niadtong Enero 11, 2021 atubangan sa Mandaue City Hall, nanawagan sila ni Cortes nga ibalik na sila sa ilang naandang rota.
Sa pakighinabi sa Superbalita Cebu ni Ronilo Gahator, ang bise-presidente sa Piston, nga tungod giusab ang ilang rota ngadto sa mga eskinita, ang kita nila naa na lang sa P50 ngadto sa P100 matag adlaw.
Sigon ni Gahator nga niubos ang ilang pangita tungod nimubo na ang ilang rota og ang ilang rota giagian gihapon sa mga bus lakip nasab ang ilang naandang rota.
Apan matod ni Cortes nga wala silay gipaboran gani ang mga tricycle ang ilang gipaningkamotan nga makabyahe dayon.
Mahitungod sa "one passenger policy," sigon ni Cortes nga aron makabawi sa ilang pangita gikan sa P8 gipasakaan ang plite ngadto sa P25. (KFD)