Tanang pribadong mga sakyanan nga nakarehistro sa mga siyudad sa Cebu, Mandaue ug Lapu-Lapu kinahanglan na nga moagi sa Private Motor Vehicle Inspection Center (PMVIC) sugod Enero 11, 2021.
Kini human gilusad sa Land Transportation office (LTO) ang duha ka PMVIC nga nahimutang sa Rocket Cargo, E.O. Perez St., Barangay Subangdaku, Mandaue City ug sa Pink Gorilla, Plaridel St. Alang-alang, Mandaue City ug usa ka PMVIC sa Danao City
Gilauman sab nilang Caindec nga mahuman na ang laing 10 ka mga PMVIC sa lain-laing lugar sa Central Visayas, walo niini anaa sa Sugbo. Karon nga aduna nay gilusad nga PMVIC, matod ni Caindec nga aduna silay giingon nga geographical area of responsibility.
“Kaning Mandaue nga facility, kining tanan nga naka-register sa Cebu City, Mandaue ug Lapu-Lapu will now be going through the PMVI centers staring today,” sigon ni Caindec.
Gipasabot sab ni Caindec nga mamahimo gihapon nga magpa-emission, apan kinahanglan pa nga moagi sa manual nga inspeksyon sa ilang buhatan. Sa pagkakaron, gi-prioritize una sa LTO ang mga commercial ug trucks sa manual inspection.
Matod ni Caindec nga world-class ug international-standard ang mga ekipo nga gigamit sa mga gilusad nga PMVIC diin kompleto na kini sa mga test nga pangayuon sa LTO.
Gani, kon ang usa ka sakyanan moagi na sa testing sa PMVIC dili na kini kinahanglan pa nga muagi sa manual nga inspeksyon sa LTO, di susama sa mga emission center, matod ni Caindec.
Ang rate alang sa four-wheeled nga sakyanan P1,800 alang sa 76 ka lain laing test nga mahuman sulod sa 15 minutos.
Samtang, sa mga motorsiklo, P600 ug muagi na sa unom ka mga test nga mahuman sulod sa lima ka minutos.
Kong ugaling adunay mga daot sa sakyanan o motorsiklo mamahimo gihapon silang makabalik human mapaayo ang daot ug katunga na lang sa presyo ang ilang bayran alang sa test.
Itandi sa una nga mag-manual inspection sa LTO, sa PMVIC tanang ekipo niini machine automated.
“Ang panglantaw nato nga kini gibuhat ni para ma-require mo or mga tag-iya og sakyanan pero og imong tan-awn ang mga test nga ilang gi-run diri sobra pa sa mga test nga mabuhat sa casa,” sigon ni Caindec.
Bisan paman nga anaa na ang PMVIC, matod ni Caindec, mamahimo gihapon nga mopadayon ang mga emission center sa paghatag sa ilang serbisyo.