DUGANG 32 ka mga kaso sa coronavirus disease (Covid-19) ang natala sa Cagayan de Oro sulod sa duha ka adlaw, sumala sa report sa City Health Office Lunes, Enero 11, 2021.
Ang kinatibuk-ang ihap sa mga kumpirmadong kaso sa Covid-19 sa dakbayan anaa na sa 2,990.
Sumala ni Acting City Health Officer Dr. Lorraine Nery, sa 32 ka mga bag-ong mga kaso, duha niini mga locally stranded individuals (LSIs), unom ang mga returning overseas Filipino workers (ROFs), ug 24 ang mga local transmissions.
Sa 24 ka mga lokal nga mga kaso, 12 ang mga close contacts sa mga pasyenteng nagpositibo sa coronavirus ug tulo ang mga local authorized persons outside residence (Apors).
Sa 2,990 nga kinatibuk-ang kaso sa Covid-19 sa syudad, 412 ang mga returning overseas Filipino workers/locally stranded individuals (ROFs/LSIs) ug 2,578 ang mga local transmissions.
Matud ni Nery, sa 2,578 nga mga local nga kaso, 182 ang mga persons deprived of liberty (PDLs), 1,325 ang mga local index cases, ug 1,071 ang mga local cases with link.
Ang Cagayan de Oro adunay 329 ka mga active cases, 92 niini na-admit sa Northern Mindanao Medical Center ug uban pang mga ospital sa syudad, 225 ang mga outpatients, ug 12 ang mga ROFs/LSIs.
Nakatala usab og 10 ka mga Covid-positive nga mga kaso nga karon naka-recover human nagnegatibo ang resulta sa ilang repeat swab test. Anaa na karon sa 2,509 ang ihap sa mga nakarekober nga mga kaso sa dakbayan.
Sa maong numero, 291 ang mga LSIs, 108 ang mga ROFs, ug 2,110 ang mga lokal nga kaso (community: 1,779; Apors: 331).
Ang ihap sa mga namatay sa Covid-19 sa syudad naa sa 152.