Maayo kay nianunsyo si Health Secretary Francisco Duque nga duna nay 50,000 ka mga dose sa bakuna nga Sinovac nga moabot sa Pilipinas karong Pebrero. Kay daw naglumba na ang mga LGU sa pagpamalit sab og ilang supply.
Sa akong nabasahan, nag-anunsyo na si Gobernador Arthur Defensor sa lalawigan sa Iloilo, Mayor Jerry Treñas sa Syudad sa Iloilo, ug Mayor Vico Sotto sa Pasig nga duna na silay gipaabot nga bakuna kay naka-order na.
Naa na say balita kabahin sa na-negotiate nga mga bakuna sa Caloocan, San Juan, Vigan, ug Valenzuela. Pipila na sab ang mga LGU nga naggahin og mga pundo alang sa pagpalit og bakuna.
Imbes ang nasudnong kagamhanan unta ang maniguro nga dunay igong bakuna ang tanang mga Pilipino, mao gud kini ang gisaad ni Presidente Rodrigo Roa Duterte, naglumba na man hinuon ang mga LGU karon.
Unsaon nga maayong-laki man kining atong Presidente, ang bakuna man kuno ang atong solusyon sa Covid-19 inig tapos sa 2020. Apan unsang hitaboa nga nag-una man ang iyang mga PSG gamit ang smuggled nga bakuna gikan sa China.
Sugbo
Makapadasig kanamong mga nagpuyo sa lungsod sa Talisay kay nianunsyo si Mayor Samsam Gullas nga mopalit ang Siyudad og bakuna.
Mosugyot lang ko, Mayor, nga molikay lang ta sa mga bakuna nga gikan sa China. Naa may gikan sa ubang mga nasud labi na kining sa Pfizer ug Moderna nga maoy gisiguro og apod-apod karon sa Estados Unidos.
Gibalita sab nga nasuko si Konsehal Raymund Garcia kay nganong wala mabalita nga nagpagahin og pundo si Mayor Edgar Labella nga P400 milyones alang sa bakuna.
Testing
Matod pa sa DOH, walay pay bag-ong strain sa coronavirus nga nakasulod sa Central Visayas. Ambot nganong naniguro na sila nga wala pa ko makabasa og balita nga duna nay kapasidad ang Pilipinas nga maka-test alang sa bag-ong strain.
Matod pa, ang genome sa virus nga gitamdan sa atong mga test dinhi sa Pilipinas mao kadtong orihinal nga kagaw nga naabot sa atua.
Nakahinumdom kita nga dugay-dugay pa kita nakaset-up og testing facilities dinhi sa rehiyon. Nya atong nasayran nga dili kini maka-detect sa bag-ong genome sa bag-ong strain. Nanga-Covid pa gyud ang daghang doctor ug nurse sa Vicente Sotto Memorial Medical Center (VSMMC). Saun na lang.