Misaka ang aktibo nga mga kaso sa Covid-19 sa dakbayan sa Sugbo, matod pa sa taho sa Department of Health (DOH-7). Base sa taho sa DOH-7 niadtong Enero 10, miabot sa 370 ang total nga kaso sa Covid-19 gikan sa 331 nga kaso sa Covid-19 basi sa ilang taho niadtong Enero 9, 2021 tungod sa pagselebrar sa kadaghanan sa katawhan sa miagi nga Pasko ug Bag-ong tuig.

Ang DOH nangandam sa pagtuo nga modaghan pa unya ang mataptan sa Covid-19 tungod sa pagsugod sa nobenaryo sa pagsaulog sa pista ni Sto. Niño, ang patron sa dakbayan sa Sugbo ingon man sa probinsya, tungod kay daghan ang modagsang nga mga tawo sa dakbayan nga moapil sa misa/nobernayo sa Sto. Niño. Giablihan og balik sa DOH-7 ang Bayanihan Cebu Sacred Heart School (SHS) Field Center ug International Eucharistic Congress Field Center, nga modawat sa mga pasente nga asymptomatic.

Maayo gani kay ang indigay sa sayaw Sinulog di na madayon human gipugngan sa IATF tungod sa hangyo sa kapulisan ingon man sa pundok sa mga doktor ug healthworkers. Si Bise Mayor Mike Rama, nga maoy nangulo sa Sinulog, gusto gyud nga ipadayon ang Sinulog showdown bisan og virtual lang ug walay manan-aw, nga ipasundayag ang video sa Enero 17, ang adlaw nga gitakda sa indigay sa sayaw Sinulog sa dalan.

Ang mga kapitan sa Brgy. San Nicolas ug sa Brgy. Basak-San Nicolas, nga ang ilang pundok nga mosalmot sa indigay sa sayaw sa Sinulog, mangayo sa Sinulog Foundation, Inc. (SFI) og hulip sa kwarta nga ilang nagasto sa pag-ensayo ug preparasyon. Si Cebu city Mayor Edgar Labella mosugot ra nga mohatag og kwarta sa mga mosalmot sa Sinulog showdown nga nakagasto na kon itugot sa Commission on Audit (COA). Ang hatagan, matod pa ni Mayor Labella, sa hulip sa kwarta kadto rang mosalmot sa selebrasyon sa ika-500 ka tuig sa Kristiyanismo sa atong nasud nga pagahimuon sa Abril kini kon wala nay Covid-19.

Pasensya na lang, Bise Mayor Mike, nga di na madayon ang imong giplano nga Sinulog showdown. Puhon og wala nay Covid-19 sa Abril 2021 sa pagsaulog sa ika-500 ka tuig sa atong Kristiyanismo, mahimo na ka mopasundayag sa Sinulog. O, di ba sa sunod tuig, Enero 2022, nalang nga Sinulog ug manghinaut ta nga daghan na ang mabakunahan og libre na ta sa Covid-19. Sayon na kaayo ka nga magwara-wara alang sa Sinulog ug pabor sad ni nimo kon unsa man ang imong plano unya sa Mayo 9, 2022 nga piliay.

Sa karon, Bise Mayor Mike, ipadaplin lang usa ang imong mga plano sa pasundayag sa Sinulog. Maayo ni alang sa imong imahen, Bise Mayor Mike, nga di nimo ipadayon ang Sinulog showdown karon nga tuig tungod kay mibalik og saka ang kaso sa Covid-19. Sa Enero 2022 puhon, ug malooy ang atong patron nga mawagtang na ning virus, mas nindot kay daghan ang mosalmot sa Sinulog showdown ug daghan usab ang modagsang nga turista nga motan-aw.

Happy Fiesta sa tanan. Pit Senyor!