GUMIKAN sa pagdagsa sa mga deboto ni Señor Santo Niño sa Basilica Minore del Santo Niño niining pagsaulog sa iyang kapistahan, nakahukom ang kaparian nga ikanselar ang nahabiling mga misa.
Taliwa usab kini sa nagsakang mga kaso sa coronavirus disease sa Dakbayan sa Sugbo.
Sugod karon, Enero 12, di na pasudlan ug patambongan og mga tawo ang Basilica sugod sa ikalima nga adlaw sa nobenaryo nga molanat hangtod Enero 17, adlaw sa iyang fiesta.
“As this change in our celebration may bring sadness to many of us, but the situation has called us to rise above the situation and to choose this course of action for the common good and benefit of all,” padayag ni Father Pacifico Nohara, Jr., rector sa Basilica.
Ang mga tawo giawhag sa kaparian nga mopadayon og sunod novena apan ipaagi na sa virtual o online aron malikayan ang pagtapok sa mga tawo nga delikado sa transmisyon sa coronavirus sanglit sa unang 10 ka adlaw sa Enero, nag-average ang Cebu City og 30 ka kaso matag adlaw.
“For the four days, we have observed that the surge of people coming to venerate and celebrate the Novena Masses has brought us into a conclusion that a greater action should be done to prevent us from the virus,” matod ni Nohara.
“We ask for your great understanding and hoping that, with our hearts and minds attuned to God’s mercy to deliver us from the scourge of the pandemic, we can celebrate the entirety of the Fiesta Señor in God’s perfect time,” matod ni Nohara.
Madungog ug makita ang online mass sa Facebook page sa Basilica del Sto. Niño ug bisita sab ang Superbalita Cebu ug SunStar Cebu Facebook pages para sa virtual nga misa.
Naumol ang desisyon pagkansela sa pagtambong sa mga tawo sa nahabiling lima ka adlaw sa novena masses atol sa tigom nga gipahigayon kagahapon, Enero 11 didto mismo sa Basilica nga gitambongan ni Nohara, mga opisyal sa Cebu City Government, Police Colonel Josefino Ligan sa Cebu City Police Office ug ubang mga opisyal simbahan.
Gipahibawo ni Nohara nga bisan kon gi-cancel nila ang face-to-face Holy masses, apan padayon nga abli ang simbahan para sa mga tawo nga gustong mosulod para mag-ampo ug modagkot alang sa Balaang Bata.
Ang mga pari nga maoy modumala sa online mass adto mag-misa sulod sa chapel sulod sa simbahan nga dili makita ug madungog sa mga tawo nga mobisita sa Basilica, matod pa ni Garganera.
Si Garganera niingon usab nga ang mga yellow railings nga gikoral sa entrance ug exit paingon sa Basilica, bisan kon wa nay face-to-face masses magpabilin aron kontrolado ang pagsulod ug gawas sa mga tawo sa simbahan.
Gikanselar usab ni Mandaue City Mayor Jonas Cortes ang tanang mga kalihukan nga adunay kalabotan sa pagsulog sa Panagtagbo Festival sa dakbayan.
Samtang gikalipay sa lokal nga kagamhanan sa Dakbayan sa Lapu-Lapu ang pagbisita sa imahen ni Señor Sto. Niño niadtong Dominggo, Enero 10, 2021.
Naabot ang imahen sa Balaang Bata pasado alas 9 sa buntag sa Lunes, Enero 11, 2021 sa St. Therese of Lisieux Chapel nga namihutang sulod sa compound sa Indiana Aerospace University (IAU) sa Barangay Basak. (Dugang taho nila ni KFD, NDT)