HUMAN sa debate sa nangaging mga semana kon angay bang ipahigayon ang Sinulog 2021, nahilom na gyud ang isyo human mahukmi sa Sinulog Foundation (SFI) ug steering committee sa Sinulog nga ikanselar na lang ang maong tinuig nga mga kalihukan nga ipahigayon unta na karong Dominggo, Enero 17. Kini human usab mipagawas sa ilang baruganan ang Regional Inter-Agency Task Force for the Management of Emerging Infectious Diseases (RIATF) sa pagdili sa maong kalihukan.
Mipagawas og rekomendasyon ang RIATF ngadto sa IATF national nga mipadayag sa ilang kusganon nga pagsupak sa pagpahigayon sa kalihukan gumikan sa kabalaka nga mao unya kini ang hinungdan nga mosaka pagbalik ang mga kaso sa Covid 19 dinhi sa dakbayan nga mikonhod na unta ning nangaging mga buwan. Apan karon misaka na usab human sa Christmas holidays, labi pa sa pagpahigayon sa Misa de Gallo.
Gumikan sa kadaghan sa mga sektor nga ningsupak, apil na ang kapulisan ug medical society, napugos ang SFI nga gipanguluhan ni Bise Mayor Mike Rama sa pag-uktaba una sa kalihukan. Posible nga ipahigayon kini sa Abril nga dungan na sa kasaulogan sa ika-500 ka tuig nga pag-abot ug pag-introduce sa Kristiyanismo dinhi sa nasud, labi pa dinhi sa Sugbo. Kana kon malinaw na ang tanan ug mohinay na ang mga kaso sa Covid 19.
Maayo kay naminaw ang SFI labi pa si Rama sa pulso sa publiko. Kay sa wala pa ang desisyon, miinsister ra ba gyud si Rama nga ipahigayon. Matod pa niya nga ang pagkanselar sa Sinulog pareho rang gikanselar ang atong kultura ug kasaysayan. Asa man diay ang iyang palabihon, ang kultura ug kasaysayan o ang kinabuhi ug siguridad sa katawhan?
Maayo kining nakab-ot nga desisyon sa IATF gumikan kay kinabuhi ang atong gihisgutan. Unsa man god nang Sinulog nga puwede man nang ipahigayon pag-usab sa umaabot nga katuigan kon malinaw-linaw nang tanan. Ang desisyon mao nga ipakita lang pinaagi sa social media ang kanhiay’ng Sinulog performances sa winning contingents. Mas maayo ni, walay gasto ug dili pa kuyaw sa atong panglawas. Sige, bisan wala nay Sinulog, mag-Pit Senyor lang gihapon ta.