Nagtuo ang Philippine Drug Enforcement Agency (PDEA) 7 nga ang nasakmit nga kapin sa P5 milyones nga balor sa nalbuphine hydrochloride o mas naila nga Nubain alang sa Sinulog party goers.
Matod ni Levi Ortiz, regional director sa PDEA 7, ang kapulisan niimbestigar sa pagkasikop ni Dioscoro Colo nga taga-lungsod sa Badian, lalawigan sa Sugbo.
Ang Nubain maoy sagad gamiton niadtong mga drug user nga mahilig og party o disco ilabi na nga nagkaduol ang kapistahan sa Senyor Sto. Niño.
Matod ni Ortiz, sukad siya milingkod isip direktor sa PDEA 7 wa na kaayo sila makasugat sa maong druga sa ilang mga operasyon ug iyang gikatingala nga mibutho kini karong panahona.
ISAGOL
Gikataho nga nauso sa Sugbo ang pagsagol sa Nubain ug shabu nga gihinganlan og “milk shake” nga gihulagwayng makamatay ilabi na niadtong mogamit niini nga dili maka-agwanta sa dosage.
“Naay possibility, kay kini gud ingun ani nga druga para man gud ni lingaw-lingaw ba, party-party ingun ana.
“So naay possibility nagtuo sila og naay activities sa Sinulog, sekreto nilang party-party basig usa pud ni sa ilang purpose,” matod pa ni Ortiz.
Usa ka regulated drug ang Nubain nga naila sa generic name niini nga “nalbuphine hydrochloride.”
Gipasabot ni Ortiz nga ginama gikan sa tanom nga opium poppy ang maong druga nga makaadik sa mga tawo nga moabuso niini.
TAMBAL
Ang maong matang sa tambal gibantayan sa mga otoridad ilabi na sa PDEA sanglit gamiton lamang kini sa pagpakalma sa usa ka pasyente nga mag-wild.
Dili kini mapalit ni bisan kinsa sa botika kon way resita sa doktor sanglit kon masobrahan sa paggamit ang usa ka tawo mahimong ikamatay niini.
Ang mogamit matod pa gaan ang paminaw sa ilang kalawasan sukwahi sa resulta sa methamphetamine hydrochloride o shabu nga moabtik ang makasuyop ug dili makatulog.
Ang Nubain nalakip sa R.A. 9165 “Comprehensive Dangerous Drugs Act” tungod sa ka addictive sa makasuway niini.
DAKPAN
Si Colo alyas Jet, 33, nasikop sa Barangay Pajo, Lapu-Lapu City. Siya kawani sa usa ka forwarding company nga nagbase sa Lapu-Lapu City ang nadakpan atol sa gipahigayon nga drug operations niadtong kadlawon sa Enero 12, 2021.
Nasakmit sa pagpangronda ang lima ka mga dagkong kahon nga dunay sud nga ampules nga naggikan sa nasud sa Pakistan.
Kapin sa 21,000 ka ampules sa Nubain ang nasakmit nga mokabat sa P5.4 milyones.
Nangatarungan ang dinakpan nga wa siya masayod nga illegal drugs diay ang iyang gi-deliver. Tuyo niya mao rang mabayran siya sa iyang sideline job.
Ang anti-illegal drug operation sa PDEG Visayas uban sa mga ahente sa PDEA 7, Regional Drug Enforcement Unit (RDEU)-7, Regional Intelligence Unit (RIU)-7 ug Station 3 sa Lapu-Lapu City Police Office (LLCPO).
Sa inisyal nga imbestigasyon si Colo gisugo sa iyang g-ila nga “madam,” usa ka Pakistani national nga matod pa nagbase sa kaulohan nga maoy tigpadala sa mga ampule sa Sugbo.
Si Colo suholan og P1,000 sa higayon nga malampuson niyang ma-deliver ang packages sa recipient niini.
Matod ni Police Lieutenant Colonel Warren Dablo, hepe sa Police Drug Emforcement Group (PDEG) Visayas (Special Operations Unit-5), usa ka Mohammad Yasen nga nagbase sa Pakistan ang mopadala sa Nubain pinaagi sa local cargo services sa Parañaque City sa Metro Manila. Gikan sa Parañaque ipadala na sab ang Nubain paingon sa Cebu o sa Lapu-Lapu City.
GIHINGINLAN
Subling gipahimangnoan ni Lapu-Lapu City Mayor Junard Chan ang mga durugista sa pagpamahawa sa dakbayan.
Kini gumikan kay walay luna ubos sa iyang administrasyon ang ilegal nga mga kalihukan.
Matod sa mayor nga sukad sa iyang paglingkod isip mayor iya nang gimandoan ang kapulisan sa paggukod sa mga durugista nga makahatag lang og kadaot sa kinabuhi sa mga Oponganon. (AYB, BBT, GCM)