Ang Sugboanong star player sa Philippine Basketball Association (PBA) nga si Roger Ray “RR” Pogoy gihatagan og dakong pasidungog sa Dakbayan sa Talisay atol sa Charter Day sa siyudad Enero 12, 2021.
Si Pogoy, kinsa lumad nga taga Barangay Cansojong, Talisay City, nakahatag og dakong dungog sa siyudad human kini makakulit og pangalan sa natad sa basketball sa tibuok nasod.
Si Talisay City Mayor Gerald Anthony Gullas ug si Konsehal Rodi Cabigas, kinsa maoy mipalabang sa resolusyon sa konseho, personal nga nidunol sa plaque of appreciation ngadto sa 28-anyos nga shooting guard sa TNT Tropang Giga.
Sa niaging conference, taliwala sa iyang injury, si Pogoy nakapakita og saktong kombati aron giyahan ang TNT ngadto sa finals sa All-Filipino conference nga makasaysayong gipahigayon sulod sa bubble didto sa Angeles City ug bugtong conference nga natigayon sa PBA sa tuig 2020 tungod sa coronavirus diseases.
“RR Pogoy’s performance in the PBA All-Filipino Cup Finals bring a lot of pride to Talisay,” padayag ni Gullas sa iyang Facebook account.
“He showed the rest of the Philippines the talents of a Talisaynon, he also showed the fighting spirit of a Talisaynon, that even in trials, adversities, and injury, he still excelled.”
Ang 6’2” nga kanhi magduduwa sa University of Cebu sa wala pa kini mobalhin sa Far Eastern University didto sa Kaulohan, nag-average og 26 puntos matag duwa sa maong conference.
Sa resolusyon, gitumbok usab ni Cabigas nga mismo si LA Tenorio sa Ginebra San Miguel mihulagway kang Pogoy kinsa sakop usab sa Gilas Pilipinas, nga maoy laing umaabot nga superstar sa PBA.
Produkto usab siya kaniadto sa Talisay City Inter-Barangay Basketball tournament ug ingon man sa Talisay City team nga mikombati sa Gullas Cup Inter-Cities/Municipalities sa 1st District sa probinsiya sa Sugbo.
“He is truly someone we can be proud of and someone our talisaynon youth can look up to,” ni Gullas pa. (JBM)