PATAY nang nakaplagan ang usa ka day care worker nga dunay daghang mga samad tinigbasan sud sa ilang balay sa alas 6 sa buntag, Enero 9, 2021 sa Sitio Lingatong, Barangay Upper Becerril, Lungsod sa Boljoon, Cebu.
Si Jovelyn Verana Meguizo, 37, minyo, napalgan nga patay sa iyang 7 anyos nga anak babaye.
Panimawos ang naestablisar sa kapulisan nga motibo.
Si Police Staff Seargeant Nelson Saquibal, imbestigador sa Boljoon Police Station nga nahinabi sa Superbalita Cebu, nagkanayon nga sa wa pa makit-i ang lawas ni Jovelyn, siya katapusan nga nakit-an Enero 8 sa barangay chapel sanglit siya ang usa sa persons in charge sa food preparation sa mga residente alang sa ilang sa besperas sa patron nga Black Nazarene.
Human niini, si Jovelyn nipauli sa ilang balay mga alas 10 sa gabii.
Ang iyang tulo ka mga menor de edad nga bata didto niya gibilin sa balay sa iyang ginikanan.
Ang iyang ig-ayaw nga si Mark Anthony Balansag Figuro, kinsa silingan niya, nitug-an sa kapulisan nga alas 2 sa kadlawon sa Enero 9, siya ug ang iyang amahan nakadungog kang Jovelyn nga nisinggit makaduha ka mga higayon.
Wa magdugay, nawala lang gilayon hinungdan nga wa sila manumbaling.
Apan pagka-alas 6 sa buntag sa Sabado, ang 7 anyos nga anak manukaw unta niya.
Ang bata nakugang sa iyang nakita nga naglunang sa dugo ang iyang inahan nga dunay daghang samad tinigbasan.
Ang bata nipahibawo sa ilang mga kabanay dayon gi-report sa kapulisan.
Matod pa ni Saquibal nga si Jovelyn dunay dakong samad sa tuong nawong, hapit maputol ang dunggan ug dunay 10 ka mga samad tinigbasan sa ulo.
Nangaputol usab ang mga kuyamoy sa mga kamot hayan tungod sa pagsagang.
“Old grudge ang motibo sa krimen. Dunay gikabangi ilang pamilya. Mao ni among gisubay sa pagkakaron,” dugang ni Saquibal. Upat ka mga anggulo unta ilang gisubay.
Apan dihang nahinabi nila ang bana nga construction worker, gisalikway na nila ang love triangle, tulis ug rape.
Ilang gipaningkamutan karon nga matumbok ang killer nga gituohan nila nga naa ra sa lugar.
Atol sa krimen, ang bana wa diha kay nagtrabaho sa Dakbayan sa Sugbo.